Asqar Mamın Frantsııa bıznes qaýymdastyǵynyń asa iri birlestigimen kelissóz ótkizdi

NUR-SULTAN. QazAqparat - QR Premer-Mınıstri Asqar Mamın Frantsııa-Qazaqstan iskerlik keńesiniń teń tóraǵasy Iv-Lýı Darrıkarer bastaǵan «Frantsııa-Qazaqstan» saýda-ónerkásip palatasynyń múshelerin jáne Frantsııa kásiporyndary qozǵalysynyń (MEDEF) ókilderin qabyldady. Bul jóninde Premer-Mınıstrdiń baspasóz qyzmetine silteme jasap QazAqparat habarlaıdy.

«Qazaqstan men Frantsııa ‒ strategııalyq seriktester. Biz senimdi yntymaqtastyqtyń berik irgetasyn qalaı aldyq. Bul eki tarap úshin de aıtarlyqtaı ekonomıkalyq, saıası jáne mádenı dıvıdendter ákeledi», — dedi A. Mamın.

Bıyl 9 aıda Qazaqstan men Frantsııa arasyndaǵy taýar aınalymy Eýropalyq Odaqtyń basqa elderindegi kórsetkishterden arta otyryp, 6%-dan astam ósti jáne $3,4 mlrd qurady. Osy jyldyń birinshi jartyjyldyǵyndaǵy QR ekonomıkasyna tikeleı frantsýz ınvestıtsııalarynyń aǵymy 24%-dan astamǵa, $537 mln deıin ulǵaıdy.

Úkimet basshysy kóptegen ınvestıtsııalyq jobalardyń belsendi iske asyrylý satysynda turǵanyn atap ótti. Qazaqstanda frantsýz kapıtalynyń qatysýymen túrli salalarda 230-ǵa jýyq kásiporyn jumys isteıdi, olardyń ishinde Total, Orano, Alstom jáne basqa da iri transulttyq korporatsııalar bar. Táýelsizdik jyldary Frantsııa kompanııalary Qazaqstanǵa $16,4 mlrd astam ınvestıtsııa saldy.

Úkimet basshysy men frantsýz kompanııalarynyń ókilderi eki eldiń bıznes qurylymdary arasyndaǵy ózara tıimdi yntymaqtastyqty nyǵaıtý, sondaı-aq, energetıka, sý sharýashylyǵy jáne turǵyn úı-kommýnaldyq ınfraqurylymyn jańǵyrtý, tsıfrlyq densaýlyq saqtaý, bıometrııalyq júıeler, avtomobıl qurastyrý, transformator óndirisi, ǵaryshtyq jerserikterdi qurastyrý jáne t. b. salalardaǵy birlesken jobalardy iske asyrý máselelerin talqylady.

Kezdesýge QR Premer-Mınıstriniń birinshi orynbasary ‒ qarjy mınıstri Á. Smaıylov, ındýstrııa jáne ınfraqurylymdyq damý mınıstri B. Atamqulov, ulttyq ekonomıka mınıstri R. Dálenov, ekologııa, geologııa jáne tabıǵı resýrstar mınıstri M. Myrzaǵalıev, densaýlyq saqtaý mınıstri E. Birtanov, syrtqy ister, energetıka, tsıfrlyq damý, ınnovatsııalar jáne aeroǵarysh ónerkásibi, saýda jáne ıntegratsııa vıtse-mınıstrleri, ulttyq kompanııalardyń basshylyǵy jáne t. b. qatysty.

Frantsýz delegatsııasy quramynda Total, Orano, Alstom, Airbus, Vicat, Air Liquide, Idemia, Renault CIS & LADA Export, Veolia, Bouygues Travaux Publics, Catering International Services, DV Conseil, Lazard, Sanofi, TechnipFMC, TECOFI S.A.S. kompanııalary boldy.

Frantsııa kásiporyndarynyń qozǵalysy (MEDEF) ‒ túrli qyzmet salasyndaǵy 800 myń kompanııany biriktiretin, eldiń bıznes qaýymdastyqtarynyń iri uıymy.