Asqar Mamın Eýropa jáne Azııa parlamentteri spıkerleriniń 4-keńesiniń qatysýshylarymen kezdesti
NUR-SULTAN. QazAqparat - QR Premer-Mınıstri Asqar Mamın Nur-Sultan qalasyna «Úlken Eýrazııa: Dıalog. Senim. Seriktestik» Eýropa jáne Azııa elderiniń parlamentteri spıkerleriniń 4-keńesine qatysýǵa kelgen Chernogorııa, Slovakııa, Soltústik Makedonııa, Moldova, Oman, Katar jáne Nepal parlamentteriniń spıkerlerimen ekijaqty kelissózder júrgizdi.
Bul týraly QR Úkimetiniń baspasóz qyzmeti habarlady.
Chernogorııa Skýpşınasynyń Prezıdenti I. Braıovıchpen, Soltústik Makedonııa Assambleıasynyń tóraǵasy T. Djaferımen jáne Slovakııanyń Ulttyq keńesiniń tóraǵasy A. Dankomen kezdesýlerde týrıstik, aýyl sharýashylyǵy, kólik salalarynda yntymaqtastyqty damytý, sonyń ishinde birlesken óndirister qurý jáne Balqan túbegi men Ortalyq Eýropa elderiniń Qazaqstannyń tranzıttik jáne kóliktik áleýetin Qytaı men Ońtústik-Shyǵys Azııa memleketteriniń naryqtaryna shyǵý úshin paıdalanýyn keńeıtý arqyly damytý máseleleri talqylandy.
Oman sultanatynyń konsýltatıvtik keńesiniń tóraǵasy H. H. Nasser Ál-Maýalımen jáne Katar memleketiniń konsýltatıvtik keńesiniń tóraǵasy Ahmad Ben Abdalla Ben Zaıd Ál-Mahmudpen áńgimelesý barysynda munaı-gaz, taý-ken metallýrgııa jáne týrızm salalaryndaǵy ınvestıtsııalyq yntymaqtastyqty damytýdyń úlken áleýetiniń bar ekeni atalyp ótti.
Nepal Parlamenti ókilderi palatasynyń spıkeri Krıshna Bahadýr Maharamen ótken kelissózderde Shymkent qalasynda týrıstik klasterdi damytý boıynsha «CG Corp Global» konglomeratynyń ınvestıtsııalyq jobalardy júzege asyrý jaǵdaıy men perspektıvalary talqylandy.
Moldova Parlamentiniń tóraǵasy Z. Grechanyımen ótken kezdesýde eki el arasyndaǵy saýda-ekonomıkalyq jáne ınvestıtsııalyq yntymaqtastyqqa serpin berý qajettigi, onyń ishinde Úkimetaralyq komıssııanyń jumysyn jandandyrý jáne Qazaqstan men Moldova kásipkerleri úshin bıznes-forým uıymdastyrý arqyly qol jetkizý atalyp ótti.
