Asqar Mamın Eýrazııalyq úkimetaralyq keńestiń qorytyndy otyrysyna qatysty
Úkimet basshysy jyl basynda Qazaqstan Respýblıkasynyń Prezıdenti Qasym-Jomart Toqaev belgilegen EAEO-ǵa QR tóraǵalyq etýiniń basym baǵyttaryn iske asyrý jónindegi jumystyń tıimdiligin atap ótti.
Premer-Mınıstr bıyl EAEO sheńberinde ónerkásiptik kooperatsııany jandandyrý boıynsha aıtarlyqtaı jumys atqarylǵanyn jetkizdi. Birinshi jartyjyldyqtyń qorytyndysy boıynsha EAEO ónerkásiptik óndirisiniń kólemi $620 mlrd qurady, bul 2020 jyldyń sáıkes kezeńindegi kórsetkishten 4,4%-ǵa joǵary. Aralyq taýarlarmen ózara saýda kólemi 40%-ǵa $20,3 mlrd deıin ósti. Jyl basynan beri Qazaqstanda EAEO-ǵa múshe memleketter bıznesiniń qatysýymen 1172 jańa birlesken kásiporyn tirkelgen (+9%).
Úkimet basshysy EAEO aıasynda ózara saýdadaǵy kedergilerdi anyqtaý jáne joıý boıynsha atqarylǵan aýqymdy jumysty atap ótti. Qazirgi ýaqytta EAEO ishki naryǵyndaǵy kedergilerdiń 80%-y joıylǵan. EAEO-daǵy ózara saýda kólemi bıylǵy 9 aıda $52 mlrd qurady jáne 2020 jyldyń sáıkes kezeńimen salystyrǵanda 32,5%-ǵa ulǵaıdy.
EAEO-nyń tranzıttik-kólik áleýetin damytý sheńberinde bıyl birlestikke qatysýshy elderdiń kólik keshenderin ıntegratsııalaý jónindegi is-sharalardy kózdeıtin 2021-2023 jyldarǵa arnalǵan kólik saıasatyn iske asyrý jónindegi jol kartasy bekitildi.
Bıylǵy jyldyń 10 aıynda Qazaqstan arqyly Ortalyq Azııa, Eýropa, Qıyr Shyǵys baǵytynda 883,2 myń JFE tasymaldandy, bul ótken jyldyń sáıkes kezeńindegiden 25%-ǵa artyq. Qytaı – Eýropa – Qytaı baǵytyndaǵy tranzıttik konteınerlik tasymal kólemi osy kezeńmen salystyrǵanda 36%-ǵa ósip, 604,5 myń JFE qurady.
EAEO elderiniń tsıfrlandyrýdaǵy jemisti yntymaqtastyǵynyń mysaly retinde A. Mamın «Tsıfrlyq kólik dálizderi», «Shekarasyz jumys» birizdendirilgen izdeý júıesi» jobalary men «COVID-syz saıahattaımyn» qosymshasyn atady. Ekonomıkalyq ıntegratsııa salasynda tıimdi quraldardy qurý boıynsha jańa tsıfrlyq bastamalardy iske asyrý qajettigi atap ótildi.
A. Mamın shekara mańyndaǵy saýda ınfraqurylymyn damytý jónindegi jumys EAEO-nyń negizgi saýda seriktesteriniń ekonomıkalarynyń dáıekti qalpyna kelýimen qatar, Eýrazııalyq ekonomıkalyq odaqtyń syrtqy saýda kórsetkishteriniń kúrt qalpyna kelý faktoryna aınalǵanyn atap ótti. Bıylǵy qańtar-qyrkúıek aılarynda EAEO elderiniń syrtqy saýda kólemi $596 mlrd qurady, bul 2020 jyldyń sáıkes kezeńimen salystyrǵanda 32,7%-ǵa artyq.
Otyrysqa qatysýshylar EAEO-nyń qara jáne tústi metaldar synyqtary men qaldyqtarynyń ortaq naryǵyndaǵy jaǵdaıdy sheshý úshin EAEO-ǵa múshe memleketterdiń metallýrgııa kásiporyndaryn shıkizatpen qamtamasyz etý jónindegi 2021-2024 jyldarǵa arnalǵan is-sharalar josparyn bekitti. EAEO aıasynda kredıttik tarıh quramyna kiretin málimettermen almasý tártibi týraly kelisimge qol qoıyldy.
Qazaqstandyq taraptyń serııalyq ónimniń shyǵý orny týraly sertıfıkattardy qoldaný úshin taýarlar tizbesin keńeıtý týraly bastamasy qoldaý tapty. Bul sheshim qazaqstandyq kásiporyndarǵa ákimshilik shyǵyndardy qysqartýǵa múmkindik beredi.
Otyrysqa Armenııa Premer-Mınıstri Nıkol Pashınıan, Belarýs Premer-Mınıstri Roman Golovchenko, Reseı Premer-Mınıstri Mıhaıl Mıshýstın, Ózbekstan Premer-Mınıstri Abdýlla Arıpov, Qyrǵyzstan mınıstrler kabınetiniń tóraǵasy – Prezıdenti Ákimshiliginiń basshysy Aqylbek Japarov qatysyp, Kýba Premer-Mınıstri Krýs Manýel Marrero beıneúndeý jasady.
Erevan qalasyna jumys sapary aıasynda Asqar Mamın Reseı Úkimetiniń Tóraǵasy Mıhaıl Mıshýstınmen jáne Belarýs Premer-Mınıstri Roman Golovchenkomen ekijaqty kelissóz júrgizdi.
