Asqar Mamın Erevanda Eýrazııalyq úkimetaralyq keńes otyrysyna qatysty

Sonymen qatar, otyrysqa Reseı Federatsııasynyń Premer-Mınıstri D. Medvedev, Belarýs Premer-Mınıstri S. Rýmas, Armenııa Premer-Mınıstri N. Pashınıan, Qyrǵyzstan Premer-Mınıstri M. Abylgazıev jáne Eýrazııalyq ekonomıkalyq komıssııa alqasynyń tóraǵasy T. Sarkısıan qatysty.

Úkimetaralyq keńes otyrysynyń kún tártibinde Odaqqa múshe memleketter arasyndaǵy saýda-ekonomıkalyq yntymaqtastyq jáne ózara saýda-sattyqty keńeıtý, sondaı-aq EAEO ishki naryǵy aıasyndaǵy kedergilerdi joıýǵa qatysty 13 másele qaraldy.

Shaǵyn quramda úkimet basshylary Odaqty damytýdyń birqatar tujyrymdamalyq máseleleri jóninde pikir almasty. EAEO tsıfrlyq transformatsııalaý aıasynda transshekaralyq ózara is-qımyldy tereńdetý, qatysýshy elder arasyndaǵy taýar aınalymynyń kólemin ulǵaıtý salasyndaǵy yntymaqtastyq, kedendik ákimshilendirýdi jetildirý tetikteri talqylandy.

Keńeıtilgen kelissózder «biryńǵaı tereze» qaǵıdaty boıynsha syrtqy ekonomıkalyq qyzmetti retteýdi jetildirý máselelerine, EAEO saýdasynyń tsıfrlyq ekojúıesin damytýǵa jaǵdaı jasaý, ónerkásiptik kooperatsııany jáne tehnologııalar transferin damytý, ekonomıkanyń jekelegen salalarynda ıntegratsııalyq áleýetti odan ári ulǵaıtý máselelerine arnaldy.

Taraptar 2018 jyldyń qorytyndysy boıynsha EAEO mańyzdy áleýmettik-ekonomıkalyq kórsetkishteriniń oń qarqynyn atap ótti. Odaq elderiniń JІÓ ósimi 2,5%, ónerkásiptik óndiris ósimi 3,1% qurady. EAEO-da ótken jyly ózara saýda kólemi 9,2% ósti, syrtqy saýdada da osyndaı úrdis baıqalady, onda jyl qorytyndysy boıynsha ósim 18,8% qurady.

Qazaqstan Premer-Mınıstri A. Mamın óz sózinde álemdik ekonomıkanyń qubylyp turǵan shaǵynda damýdyń oń qarqynyn saqtaý úshin barlyq kúsh-jiger salý qajettigin atap ótti. Búginde Odaqqa qatysýshy barlyq eldermen ózara saýdadaǵy kedergilerdi joıý úshin belsendi birlesken jumystar júrgizilip jatyr. Tájirıbe kórsetkendeı, jańa kedergiler baıqalýda, bul óz kezeginde budan da tyǵyz ekonomıkalyq qatynastardy damytýdyń ındıkatory bolyp tabylady.

«Bizge qarqynymyzdy tómendetpeý kerek», - dedi Asqar Mamın. «Qazirgi kedergilerdi joıý ózara saýda kólemin ulǵaıtyp, elder arasyndaǵy ekonomıkalyq baılanystardy keńeıtýge múmkindik beredi».

Qazaqstandyq tarap EAEO aıasynda sáıkestendirý quraldary arqyly taýarlardy tańbalaý boıynsha ıntegratsııalyq yntymaqtastyq máselelerin retteýdi jetildirý qajettigine, tranzıttik tasymaldardy qadaǵalaý júıesin engizýge, kedendik ákimshilendirýdi kúsheıtýge, tsıfrlyq saýdany damytýǵa, Odaqtyń derekter tranzıti salasyndaǵy tranzıttik áleýetin arttyrýǵa nazar aýdardy.

«Ózara paıda, ymyraǵa kelý jáne barlyq taraptardyń múddelerin eskeretin tıimdi sheshimder shyǵarý qaǵıdattarynyń negizinde ózara qarym-qatynastarymyzdy qalyptastyrý EAEO odan ári nyǵaıtýǵa belsene yqpalyn tıgizetin bolady», - dedi Asqar Mamın.

«2025 jylǵa deıin eýrazııalyq ekonomıkalyq ıntegratsııany damytýda biz úshin basty shart - ekonomıkalyq quraýyshynyń bolýy»,-dedi ol.

Otyrys qorytyndysy boıynsha «Eýrazııalyq ónerkásip kooperatsııa, sýbkontraktatsııa jáne tehnologııalar transferi jelisi» jobasyn iske asyrý týraly, Odaqtyń ishki naryǵynyń jumysy aıasynda kedergilerdi joıý boıynsha jumystar barysy týraly, EAEO-ta tsıfrlyq saýda ekojúıesin damytý úshin jaǵdaılar jasaý týraly, syrtqy ekonomıkalyq qyzmetti retteý júıesinde «biryńǵaı tereze» ulttyq tetiginiń etalondyq úlgisin sıpattaý týraly birqatar qujattarǵa qol qoıyldy.

Eýrazııalyq úkimetaralyq keńestiń kelesi otyrysy bıyl 9 tamyzda Sholpan ata qalasynda (Qyrǵyzstan Respýblıkasy) ótedi.