Asqar Mamın Energetıka mınıstrligine bıtým baǵasyn turaqty ustaýdy tapsyrdy

NUR-SULTAN. QazAqparat – Premer-Mınıstr Asqar Mamın Úkimet otyrysynda jaýapty mınıstrlikter men ákimdikterge jol-kólik ınfraqurylymyn damytý baǵytynda birqatar tapsyrmalar berdi, dep habarlaıdy QazAqparat tilshisi.

Áýeli Úkimet basshysy Indýstrııa jáne ınfraqurylymdyq damý mınıstrligine ákimdiktermen jáne «QazAvtoJol» ulttyq kompnııasymen birlesip, josparlanǵan jobalardyń ýaqtyly iske qosylýyn jáne bıyl jyl sońyna deıin bólingen qarajattyń tolyq ıgerilýin qamtamasyz etýdi tapsyrdy. Al Energetıka mınıstrligine qurylys maýsymynyń qyzǵan shaǵynda baǵalardyń ósýine jol bermeı, barlyq jobalarǵa bıtýmnyń málimdelgen qajettiligin qamtamasyz etýdi júktedi.

Sondaı-aq, Úkimet basshysy jyl sońyna deıin rekonstrýktsııalanǵan ýchaskelerde «aqy tóleýdi» ónerkásiptik paıdalanýǵa engize otyryp, avtomobıl joldaryn ózin-ózi qamtamasyz etýge kóshirý boıynsha jumysty aıaqtaý qajettigin atap ótti. Oblys ákimdikterine «Atameken» UKP-men birlesip jol boıyndaǵy servıs obektilerin jańǵyrtý jáne olardy Ulttyq standartqa sáıkes keltirý jónindegi jumysty jandandyrý tapsyryldy.

«Qoıylǵan mindetterdi iske asyrýdyń tıimdiligi asa mańyzdy. Barlyq is-sharalar belgilengen merzimderde aıaqtalýy tıis», - dedi A. Mamın.

Eske salsaq, osy Úkimet otyrysynda Beıbit Atamqulov Batys óńirlerdegi ishki joldardyń sapasyn synǵa aldy.

Sondaı-aq, vedomstvo basshysy eldegi aqyly joldardan qansha qarajat túsetinin baıandady.