Asqar Mamın Eńbek mınıstrliginiń ujymyna jańa basshyny tanystyrdy
NUR-SULTAN. QazAqparat – Úkimet basshysy Asqar Mamın QR Eńbek jáne halyqty áleýmettik qorǵaý mınıstrliginiń ujymyna vedomstvonyń jańa basshysy Birjan Nurymbetovti tanystyrdy. Bul týraly QazAqparat primeminister.kz saıtyna silteme jasap habarlaıdy.
QR Úkimetiniń basshysy Berdibek Saparbaevqa qazaqstandyqtardyń áleýmettik ál-aýqatyn jaqsartýǵa qosqan úlesi úshin alǵys bildirdi. Onyń basshylyǵymen Eńbek jáne halyqty áleýmettik qorǵaý mınıstrligi QR Tuńǵysh Prezıdenti - Elbasy Nursultan Nazarbaevtyń jáne Memleket basshysy Qasym-Jomart Toqaevtyń áleýmettik salany jańǵyrtý boıynsha qoıǵan mindetterin sheshýge qatysty júıeli jumysty uıymdastyrdy.
Jańa mınıstrdi tanystyrý kezinde Asqar Mamın Birjan Nurymbetovtiń áleýmettik saladaǵy 20 jyldyq jumys tájirıbesin atap ótti. Túrli jyldary ol eńbek jáne halyqty áleýmettik qorǵaý vıtse-mınıstri bolyp jumys istedi, QR Premer-Mınıstriniń Keńsesi Basshysynyń orynbasary laýazymynda boldy. 2017 jyldan bastap QR Kásipodaqtar federatsııasy tóraǵasynyń birinshi orynbasary qyzmetin atqardy.
Buǵan deıin Eńbek jáne halyqty áleýmettik qorǵaý mınıstri Berdibek Saparbaev qyzmetinen bosatylyp, QR Premer-Mınıstriniń orynbasary laýazymyna taǵaıyndalǵanyn habarlaǵan bolatynbyz.
Prezıdent Jarlyǵymen mınıstrliktiń jańa basshysy bolyp Birjan Nurymbetov taǵaıyndaldy.
