Asqar Mamın: Elbasy men Prezıdenttiń tapsyrmalaryn oryndaýymyz kerek
«15 shilde kúni Úkimettiń keńeıtilgen otyrysynda Memleket basshysy eldiń turaqty damýyna baǵyttalǵan birqatar naqty mindetterdi belgiledi. Úkimettiń basty mindeti – halyqtyń ómir sapasy men tabysyn arttyrý, jańa jumys oryndaryn ashyp, ınvestıtsııalardy tartý. Keńeıtilgen otyrystyń qorytyndysy boıynsha ekonomıkanyń odan ary damýyna serpin beretin josparlar bekitildi. Barlyq memlekettik organdar men ákimdikter ony oryndaýy tıis. Qańtar-shilde aılarynda JІÓ ósimi 4,2 paıyzdy qurady. Birqatar salalarda, sonyń ishinde qurylys 11,5 paıyz, saýda 7,5 paıyz, óńdeýshi sektorda, onyń ishinde kólik quraýda 17,7 paıyz ósim baıqalady. Al kómir men hımııa ónerkásibinde, qara metallýrgııada ósim joq. Salalyq mınıstrlikter josparly kórsetkishterge qol jetkizý boıynsha sharalardy kúsheıtýi qajet», - dedi Úkimet basshysy.
Asqar Mamın óz sózinde 7 aıdyń qorytyndysyna qaraǵanda bazalyq kórsetkishter boıynsha Atyraý, Qaraǵandy, Qostanaı, Qyzylorda jáne Túrkistan, ShQO ákimdikteri tıimdi jumys júrgizgenin atap ótti.
«Ol qalǵan óńirler úshin jaqsy úlgi. Al Mańǵystaý, BQO, Shymkent, Nur-Sultanda qurylys, ınvestıtsııalar, turǵyn úı tapsyrý boıynsha kórsetkishter tómen», - dedi ol.
Premer-mınıstr óz sózinde bólingen qarajatty ıgermeı jatqan vedomstvolar men ákimdikterdi synǵa aldy. Árbir vedomstvo basshysy aldaǵy 1 aıdyń ishinde olqylyqtardy retteýge ýáde berdi.
«Memlekettik organdar men ákimdikterdiń basshylary úshin bıýdjet qarajatyn josparly túrde ıgerýge qol jetkizý boıynsha jaýapkershilik júkteımin. Jalpy, sapaly jáne ornyqty ekonomıkalyq ósimdi qamtamasyz etý úshin ınvestıtsııany belsendi túrde tartý boıynsha sharalaryn qabyldaý qajet. Investıtsııalardy tartý jónindegi úılestirý keńesiniń otyrysynda osy máseleni jan-jaqty talqylaımyz. Tıisti jumys oryndaryn ashý, ekonomıkany ártaraptandyrý, eksportty damytý, tehnologııalardy tartý sekildi máselelerdi kelesi otyrysta qarastyramyz. Biz Elbasy men Prezıdenttiń qazaqstandyqtardyń ál-aýqatyn jaqsartýǵa baǵyttalǵan bastamalary men tapsyrmalaryn ýaqtyly jáne sapaly iske asyrylýy jumysty jalǵastyrýymyz kerek», - dedi Asqar Mamın.
