Asqar Mamın Ekologııa mınıstrliginiń ujymyna Serikqalı Brekeshevti tanystyrdy
Úkimet basshysy Ekologııa, geologııa jáne tabıǵı resýrstar mınıstrliginiń aldyna jańa Ekologııalyq kodeksti tıimdi iske asyrýdy qamtamasyz etý, Tómen kómirtekti damý tujyrymdamasyn daıyndaý, orman qoryn ulǵaıtý, sý resýrstary men balyq sharýashylyǵyn basqarý júıesin odan ári damytý boıynsha mańyzdy mindetter qoıylǵanyn atap ótti.
«Memleket basshysy Ulttyq geologııalyq qyzmetti qurýdy tapsyrdy. Geologııalyq barlaýdy damytýǵa jáne jer qoınaýyn keshendi zertteýge, geologııalyq aqparattyń ashyq tsıfrlyq bazasyn qurýǵa erekshe nazar aýdarý qajet», — dedi A. Mamın.
Serikqalı Brekeshev 1972 jyly 14 qazanda Pavlodar qalasynda dúnıege kelgen. 1995 jyly Atyraý polıtehnıkalyq ınstıtýtyn «Munaı jáne gaz ken oryndaryn ıgerý» mamandyǵy boıynsha bitirgen.
Túrli jyldary energetıka jáne mıneraldyq resýrstar, munaı jáne gaz mınıstrlikterinde, «QazTransGaz» AQ-da basshylyq qyzmetterde jumys istedi. 2020 jyldyń naýryz aıynan bastap QR ekologııa, geologııa jáne tabıǵı resýrstar vıtse-mınıstri qyzmetin atqardy.
