Asqar Mamın: Depýtattar usynysy boıynsha Úkimet naqty jumysty uıymdastyrady
ASTANA. QazAqparat - Búgin QR Parlamenti palatalarynyń birlesken otyrysynda depýtattar ótken jylǵy respýblıkalyq bıýdjettiń atqarylýy týraly Úkimet pen Esep komıtetiniń esepterine qoldaý bildirdi, dep habarlaıdy QazAqparat tilshisi.
«Búgin depýttar kótergen barlyq máseleler men usynystarǵa qatysty Úkimet naqty jumysty uıymdastyratyn bolady. Qajetti sharalar shuǵyl túrde atqarylyp, tıisti jol kartasy qabyldanady. Aldaǵy ýaqytta da Úkimet Parlament depýtattarymen birlese jumys júrgizetinine senimdimin», - dedi QR Úkimet basshysy Asqar Mamın.
Budan buryn habarlanǵandaı, QR Parlamenti palatalarynyń birlesken otyrysynda QR Premer-Mınıstriniń birinshi orynbasary-Qarjy mınıstri Álıhan Smaıylov 2018 jylǵy respýblıkalyq bıýdjettiń oryndalýy barysy týraly esebin tanystyrdy.
«2018 jyly bıýdjettik saıasat memlekettik qarjynyń turaqtylyǵyn nyǵaıtýǵa jáne ekonomıkanyń odan ári ósýine negizdeldi. Sol sebepti ekonomıkanyń naqty sektorlaryn qoldaý, jumys oryndaryn saqtaý jáne áleýmettik salany damytý bıýdjettiń atqarylýynyń basym baǵyttary boldy. Jyl qorytyndysymen elimizdiń ekonomıkasynyń ósýi 4,1 paıyzdy qurady. Bıýdjettiń kiristeri 8,8 trln teńgege jetti. Onyń ishinde salyqtar - 5,7 trln teńge. 2017 jylmen salystyrǵanda salyqtardyń jalpy kirister kólemindegi úlesi 15 paıyzǵa ósip, 65 paıyzǵa jetti. Jalpy Іshki Ónimdegi munaıǵa qatysty emes kiristerdiń úlesi 8 paıyzdy qurady (2017 jyly - 7,8%). Oǵan ındýstrııalandyrýǵa, agroónerkásipti, orta jáne shaǵyn bıznesti, turǵyn úı qurylysy men ınfraqurylymdy jáne áleýmettik salany damytýǵa baǵyttalǵan memlekettik baǵdarlamalardy qarjylandyrýdyń qorytyndylary yqpal etti», - dedi Smaıylov.
Shyǵystar boıynsha barynsha joǵary atqarylýǵa qol jetkizildi, ıaǵnı 99,8 paıyz. Bıýdjet qarajatynyń ıgerilýi kelesi kórsetkishtermen sıpattalady. Bıýdjettiń áleýmettik baǵyty kúsheıdi. Bul salaǵa búkil shyǵystardyń jartysyna jýyǵy, ıaǵnı 4,3 trln teńge jiberildi.
Aıta keteıik, QR Parlamenti palatalarynyń birlesken otyrysynda Esep komıtetiniń tóraıymy Natalıa Godýnova qarjylyq zańbuzýshylyqtarǵa jaýapty adamdardy jazalaý máselesin kóterdi.
Onyń paıymynsha, qarjylyq zańbuzýshylyqtar úshin laýazymdy adamdardy mindetti túrde jaýapqa tartýdy engizý bóliginde qoldanystaǵy zańnamaǵa ózgerister engizý óte mańyzdy. Osy oraıda zańbuzýshylyq somasyna baılanysty, sondaı-aq bıýdjet qarajaty men memleket aktıvterin tıimsiz josparlaǵany jáne tıimsiz paıdalanǵany úshin osy jaýaptylyqtyń ara-jigin belgileý qajet.
