Asqar Mamın BQO ákiminiń jumysyn synǵa aldy
ASTANA. QazAqparat - Batys Qazaqstan oblysynda turǵyn úı qurylysynyń qarqyny tómen. Bul týraly búgin «Nurly jer» baǵdarlamasynyń iske asyrylýy qaralǵan Úkimet otyrysynda Premer-Mınıstr Asqar Mamın aıtty, dep habarlaıdy QazAqparat tilshisi.
«Altaı Seıdiruly, sizderde de turǵyn úıge salynatyn ınvestıtsııa kólemi 55 paıyzǵa azaıǵan. Osy jyldyń eki aıynyń nátıjesi boıynsha 30 myń sharshy metr baspana paıdalanýǵa berildi. Bul kórsetkish ótken jyldyń osyndaı kezeńimen salystyrǵanda 40 paıyzǵa az», - dedi Úkimet basshysy Batys Qazaqstan oblysynyń ákimi Kólginovke qarata.
Oblys basshysynyń aıtýynsha, bıyl «Nurly jer» baǵdarlamasy aıasynda 20 kóppáterli turǵyn úı, ıaǵnı 2 704 páter jáne aýyldarda 440 páterli 70 turǵyn úıdiń qurylysy júrip jatyr. Osy maqsatqa 11,1 mlrd teńge kóleminde qarajat qarastyrylǵan. Onyń ishinde turǵyn úı qurylysyna 8,7 mlrd teńge jáne ınjenerlik kommýnıkatsııa júrgizýge 2,4 mlrd teńge bólingen. 2 aıdyń qorytyndysy boıynsha qarajattyń ıgerilýi - 100 paıyz.
«2018 jyly 430 myń sharshy metr el ıgiligine berilse, bıyl 450 myń sharshy metr dep josparlap otyrmyz. Qurylys jumystarynyń naqty kólem ındeksi 2 aıdyń qorytyndysy boıynsha 109,5 paıyzdy qurady. Turǵyn úıdi paıdalanýǵa berý ótken jylǵy kezeńmen salystyrǵanda 40 paıyzǵa tómendedi. Ol ras. Az bolýy bıylǵy aýa raıynyń qolaısyzdyǵyna baılanysty. 2 aıda qalyń qar jaýyp, boran soqty. Naýryz aıynda aýa raıy jaqsardy, qurylys qarqyny qalpyna keldi. Josparlanǵan qurylys kólemi - 1-toqsan qorytyndysy boıynsha 130 myń sharshy metr, ıaǵnı, 100 paıyz deńgeıge jetemiz degen boljam bar», - dedi Altaı Kólginov.
Osy oraıda Úkimet basshysy oblys boıynsha «7-20-25» baǵdarlamasy boıynsha nebári 181 jeńildetilgen kredıt maquldanǵanyn aıtty.
«Bul - respýblıkalyq kórsetkishtiń 3 paıyzy ǵana», - dedi Premer-Mınıstr.
Óz kezeginde BQO ákimi Úkimet basshysynyń barlyq tapsyrmasy oryndalatynyn aıtyp sendirdi.
«Qazirgi ýaqytta «7-20-25» baǵdarlamasymen 2 mlrd teńgege 180 páter tapsyrylǵan. Bul jumys toqtaǵan joq. Aldaǵy ýaqytta jumys qarqynyn kúsheıtemiz. Suranys bar, úıler salynyp jatyr, oryndaımyz», - dedi ol.
