Asqar Mamın bıznesti salyqtyq yntalandyratyn zańnamalyq túzetýler paketin qabyldaýdy tapsyrdy
«Shaǵyn jáne orta bıznes sýbektileriniń salyqtyq jáne kedendik bereshegin májbúrlep óndirip alý 2021 jylǵy 1 shildege deıin toqtatyp qoıyldy. Bul kásipkerlerge aınalym kapıtalyn toltyrý úshin qosymsha 279 mlrd teńgeni jumsaýǵa múmkindik jasaıdy. Ekinshi deńgeıdegi bankterde kredıtter boıynsha tólem merzimin aǵymdaǵy jylǵy 1 shildege deıin shegerý sharalary qabyldandy. Keıinge qaldyrylǵan tólemder kólemi 750 mlrd teńgeni quraıtyn bolady», - degen Úkimet basshysy Úkimetiń qazirgi mindetim bıznestiń damýyna qoldaý kórsetý ekenin atady.
«Jalpy, osy qabyldanyp otyrǵan sharalar aǵymdaǵy jylǵy elimizdiń ekonomıkasynyń ósý qurylymynda 0,8 paıyzdyq pýnktke deıin quraıtyn bolady. Osyǵan baılanysty mynadaı tapsyrma beremin: Birinshi, Ulttyq ekonomıka mınıstrligi memlekettik organdarmen birge Ekonomıkalyq ósýdi qalpyna keltirý jónindegi jańartylǵan keshendi jospardyń ýaqtyly oryndalýyn qamtamasyz etsin», - dedi Asqar Mamın.
Ol úshin Úkimet turaqty túrde «Atameken» palatasymen jáne óńirlik Kásipkerler keńesterimen birge bıznesti meılinshe tolǵandyratyn máselelerdi jedel qarap, olar boıynsha tıisti sheshimder qabyldaýy kerek.
«Ekinshi, bıznesti salyqtyq yntalandyrý jónindegi zańnamalyq túzetýler paketin qabyldaý qamtamasyz etilsin jáne 2021 jylǵy 1 maýsymǵa deıin Parlamentte tıisti jumys júrgizsin. Úshinshi, memlekettik organdar, ákimdikter, «Damý» qory «Atameken» palatasymen birge qoldaýdyń barlyq túrin alýǵa bıznesten túsetin ótinimderdiń asa qysqa merzimde qaralýyn qamtamasyz etsin», - dep túıindedi Premer-Mınıstr.