Asqar Mamın: Bizdiń mindetimiz – kásipkerlikti damytýdyń ózekti máselelerin jedel sheshý

NUR-SULTAN. QazAqparat - 18 naýryz kúni QR Premer-Mınıstri Asqar Mamın Kásipkerlik máseleleri jónindegi jobalyq ofıs otyrysyn ótkizdi, dep habarlaıdy QazAqparat.

Otyrysqa «Atameken» UKP tóralqa tóraǵasy Tımýr Qulybaev, Úkimet músheleri, óńirlerdiń ákimderi, «Samuryq-Qazyna» UÁQ» AQ, damý ınstıtýttarynyń, Qazaqstan qarjygerleri qaýymdastyǵynyń, óńirlik kásipkerler palatalarynyń basshylyǵy jáne t. b. qatysty. Úkimet maquldaǵan kásipkerlikti memlekettik qoldaý sharalary týraly ulttyq ekonomıka mınıstri Áset Erǵalıev, bıznestiń júıeli syn-tegeýrinderi, jeńildikpen nesıe berý, mıkroqarjy uıymdary ınstıtýttaryn, áleýmettik-kásipkerlik korporatsııalaryn damytý, óńirlerdegi ShOB-ty damytý áleýeti, memlekettik satyp alýdaǵy jergilikti qamtý, «Samuryq-Qazyna» UÁQ» AQ jáne jer qoınaýyn paıdalanýshylardyń satyp alýlary týraly «Atameken» UKP basqarma tóraǵasy Abylaı Myrzahmetov, Básekelestikti qorǵaý jáne damytý agenttiginiń tóraǵasy Serik Jumanǵarın, saýda jáne ıntegratsııa mınıstri Baqyt Sultanov baıandady. «Atameken» UKP tóralqa tóraǵasy T. Qulybaev bıylǵy 11-12 naýryzda ekonomıkanyń neǵurlym zardap shekken salalaryndaǵy bıznes ókilderimen ótken qosymsha kezdesýlerdiń qorytyndysy boıynsha kásipkerlikti damytýdyń 59 júıeli salalyq máselesi aıqyndalǵanyn atap ótti.

«Atameken» UKP usynǵan málimetter negizinde Premer-Mınıstr memlekettik organdar men uıymdarǵa jeke sektordy qoldaýdyń qosymsha sharalaryn, onyń ishinde ShOB-tyń kredıtteýge qoljetimdiligin odan ári keńeıtý, bızneske retteýshilik jáne fıskaldyq júktemeni tómendetý, otandyq óndirýshilerdiń memlekettik satyp alýlarǵa, offteık-kelisimsharttardy qoldanýdy keńeıtýdi qosa alǵanda, jer qoınaýyn paıdalanýshylardyń jáne «Samuryq-Qazyna» UÁQ» AQ-nyń satyp alýlaryna qatysý áleýetin damytý arqyly qaraýdy tapsyrdy. Pysyqtalyp jatqan sharalar aıasynda óńirlerde aýyl sharýashylyǵy ónimin óndirý jáne qaıta óńdeý sharttaryndaǵy aıyrmashylyqty eskere otyryp, AÓK-te sýbsıdııalaý júıesi jetildiriledi, sondaı-aq aýyl sharýashylyǵy taýaryn óndirýshiler úshin qarjylandyrýdyń qoljetimdiligi artady. Úkimet basshysy retteletin satyp alýlardaǵy jergilikti qamtýdy baqylaýdy, óńirlerdiń ekonomıkalyq kartasyn ýaqytyly ári sapaly toltyrýdy qamtamasyz etýdi, otandyq kásiporyndardyń óndiristik qýattaryn júkteý maqsatynda olardy pasporttaýdy aıaqtaýdy jáne mıkroqarjy uıymdaryn qurýdy jedeldetýdi tapsyrdy. «Bizdiń mindetimiz – bıznesti júrgizýge qajetti jaǵdaılardy jetildirý jáne kásipkerlik salasyndaǵy ózekti máselelerdi jedel sheshý», — dedi A. Mamın.

2021 jyly «Qarapaıym zattar ekonomıkasy», «BJK-2025», «Eńbek», «Jumyspen qamtýdyń jol kartasy» baǵdarlamalary jáne Ulttyq banktiń aınalym qarajatyn tolyqtyrýǵa nesıelendirý baǵdarlamasy aıasynda bıznesti qoldaýǵa 703 mlrd teńge qarajat qarastyrylǵan. «Qarapaıym zattar ekonomıkasy» jeńildetilgen nesıe berý baǵdarlamasy boıynsha 2019 jylǵy jeltoqsan men 2021 jylǵy naýryz aralyǵynda 700,3 mlrd teńgege 2855 joba maquldandy, 556,5 mlrd teńgege 2273 joba sýbsıdııalandy. «BJK – 2025» baǵdarlamasyn iske asyrýda oń dınamıka baıqalýda — osy jyldyń qańtar-aqpan aılarynda 88,2 mlrd teńge somasyna 669 joba sýbsıdııalandy, 2900 joba kepildendirildi.