Asqar Mamın: Birinshi basshylar Jalpyulttyq jospardyń ýaqtyly oryndalýyn qamtamasyz etýi kerek

NUR-SULTAN. QazAqparat – Úkimet basshysy Asqar Mamın Prezıdent joldaýyn iske asyrý boıynsha Jalpyulttyq is-sharalar josparyna qatysty mınıstrler men ákimderge naqty tapsyrma berdi, dep habarlaıdy QazAqparat tilshisi.

«Memleket basshysy óziniń Qazaqstan halqyna Joldaýynda memlekettik jáne ekonomıkalyq saıasattyń jańa jaǵdaıǵa sáıkes keletin jańa baǵytyn atap ótti. Joldaýdyń mindetterin sapaly ári jedel sheshý úshin Memleket basshysy atap ótken negizgi 11 baǵyt boıynsha Jalpyulttyq jospar ázirlendi. Úkimettiń basty mindeti - halyqtyń ál-aýqatyn arttyrý, ekonomıkany damytý jáne turaqty jumys oryndaryn qurý», - dedi Asqar Mamın Úkimet otyrysynda.

Onyń aıtýynsha bıýdjettik josparlaýdyń jańa júıesinde ulttyq basymdyqtar qamtamasyz etiledi. Bıýdjetten tys qorlardyń qarajaty eskerilip, «keńeıtilgen bıýdjet» júıesi engiziledi.

«Azamattarymyzdyń áleýmettik ál-aýqatyn qamtamasyz etý maqsatynda turǵyn úıge qoljetimdilikti keńeıtý, qolaıly otbasy-demografııalyq jaǵdaı jasaý, ekologııany, bilim berýdiń sapasyn jaqsartý, sondaı-aq densaýlyq saqtaý júıesin jetildirý jónindegi sharalar qabyldanady. Memleket basshysynyń Joldaýyn iske asyrý jónindegi búgin usynylǵan Jalpyulttyq is-sharalar jospary qoıylǵan mindetterge saı. Prezıdent Jospardy bekitken soń, barlyq memlekettik organdar men ákimdikter birden ony oryndaýǵa kirisýi kerek. Birinshi basshylar jospardyń is-sharalaryn úlken jaýapkershilikpen, sapaly ári ýaqtyly oryndalýyn qamtamasyz etýleri qajet», - dedi Asqar Mamın.

Eske sala ketsek búgin Úkimette Memleket basshysynyń «Jańa jaǵdaıdaǵy Qazaqstan: is-qımyl kezeńi» atty Joldaýyn iske asyrý boıynsha Jalpyulttyq is-sharalar josparynyń jobasyn jarııalanǵan bolatyn.