Asqar Mamın bilim uıymdarynyń oqý jylyna 100% daıyn bolýyn tapsyrdy

NUR-SULTAN. QazAqparat – Barlyq bilim berý uıymy oqý jylyn bastaýǵa 100 paıyz daıyn bolýy tıis. Bul týraly Úkimet otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.

«Mektepterde jóndeý jumystaryn ýaqytynda aıaqtaý qajet. Máselen, jóndeý jumystary aıaqtalmaǵan mektepterdiń eń kóbi Almaty oblysynda – 9 mektep, odan keıin Qostanaı oblysynda – 6, Batys Qazaqstan oblysynda – 5. Ákimderge qoıylatyn mindet – barlyq bilim berý uıymdary oqý jylyn bastaýǵa 100 paıyz daıyn bolýy tıis. Balalardyń qaýipsizdigi, tamaqtandyrý jáne mektepke jetkizý boıynsha barlyq máseleler sheshimin tabýy kerek», - dedi Asqar Mamın.

Sonymen qatar Úkimet basshysy kolledjderdi bıznestiń basqarýyna berý týraly usynysty qoldaıtynyn aıtty.

«Bul baǵyt Túrkistan oblysynda jaqsy damyǵan, osy tájirıbeni paıdalanýǵa bolady», - dedi Premer-Mınıstr.