Asqar Mamın bilim berý nysandarynyń qaýipsizdigi týraly tapsyrma berdi
«Bilim berý obektilerinde qolaıly ári qaýipsiz orta qalyptastyrý – bizdiń basym mindetterimizdiń biri. Mektepterde tekserý júrgizý barysynda terrorızmge qarsy qaýipsizdikti buzý faktileri anyqtaldy. Oqý oryndaryn kásibı kúzetpen qamtamasyz etý, týrnıketter, «dabyl túımeleri» men kameralar ornatý jumysynyń uıymdastyrylý deńgeıi jetkiliksiz. Kásipqoı kúzetpen qamtamasyz etilgen mektepterdiń eń kóbi Nur-Sultan jáne Almaty qalalarynda, Qaraǵandy, Soltústik Qazaqstan oblystarynda. Al Shyǵys Qazaqstan oblysynda mektepterde ornatylǵan kameralar talaptarǵa tolyq sáıkes keledi», - dedi A. Mamın Úkimettiń búgingi otyrysynda.
Premer-Mınıstr oqý oryndarynyń qaýipsizdigin qamtamasyz etý jumysyn aıtarlyqtaı jandandyrý qajettigin basa aıtty. Sonymen birge óńirlerde balalarǵa qatysty jáne balalar arasyndaǵy quqyq buzýshylyqtar profılaktıkasyn salaaralyq úılestirýdi kúsheıtý talap etiledi.
«Osyǵan oraı, óńirlerdiń ákimdikteri jańa oqý jyly bastalǵansha bilim berý uıymdaryn qaýipsizdiktiń materıaldyq-tehnıkalyq quraldarymen qamtamasyz etsin. Bul ishki ister organdarynyń jedel den qoıý ortalyǵyna shyǵatyn beınebaqylaý júıelerin jańartýǵa, kásibı kúzetpen, týrnıkettermen jáne «dabyl túımelerimen» qamtamasyz etýge qatysty. Ekinshi, Bilim mınıstrligi múddeli memlekettik organdarmen birge bıylǵy 10 shildege deıin Bilim berý uıymdarynda balalardyń qaýipsizdigin qamtamasyz etý jónindegi jol kartasyn bekitsin», - dep tapsyrma berdi Úkimet basshysy.
Sonymen birge, Bilim, Mádenıet, Densaýlyq saqtaý, Іshki ister mınıstrlikteri bıylǵy 20 shildege deıin terrorıstik turǵydan osal vedomstvolyq obektilerdiń terrorızmge qarsy qorǵalýyn uıymdastyrý jónindegi nusqaýlyqty bekitýi qajet.
«Bilim, Іshki ister, Tótenshe jaǵdaılar mınıstrlikteri men óńirlerdiń ákimdikteri bıylǵy shildeniń sońyna deıin tótenshe jaǵdaılar týyndaǵan kezdegi personal men oqýshylardyń is-qımyl algorıtmin bekitsin. Sonymen qatar oqý oryndarynda únemi terrorızmge qarsy oqý-jattyǵý ótkizip turý kerek. Óńirlerdiń ákimdikteri qıyn balalarmen júrgiziletin jumys boıynsha mektep psıhologtary men kámeletke tolmaǵandar isi jónindegi ınspektorlardy úılestirýdi kúsheıtý qajet. Óńir ákimderi oqý oryndarynyń qaýipsizdigi máselelerin erekshe baqylaýǵa alsyn», - dedi Asqar Mamın.
