Asqar Mamın Ashhabadta Ekonomıkalyq yntymaqtastyq uıymynyń sammıtine qatysty
QR Premer-Mınıstri Asqar Mamın Ekonomıkalyq yntymaqtastyq uıymynyń sammıtinde sóılegen sózinde Qazaqstannyń EYU elderimen jıyntyq taýar aınalymynyń bıylǵy 9 aıda 31%-ǵa $8,2 mlrd-qa deıin óskenin atap ótti. Bul pandemııaǵa deıingi 2019 jyldaǵy kórsetkishten 22%-ǵa joǵary.
Úkimet basshysy AÓK salasynda birlesken óndiristik úderister qurýdy, azyq-túlik taýarlarynyń ózara saýdasynda offteık kelisimsharttardy qoldanýdy keńeıtýdi jáne basqa da sharalardy kózdeıtin saýda aǵyndaryn arttyrý jónindegi jol kartasyn jáne EYU azyq-túlik qaýipsizdigi baǵdarlamasyn ázirleýdi usyndy.
Premer-Mınıstr EYU keńistiginde tıimdi jáne ózara tolyqtyrylatyn baǵyttardy qalyptastyrý jónindegi jumysty odan ári jalǵastyrý qajet ekenin atap ótti. Osy jyldyń aıaǵyna deıin Qazaqstan aýmaǵy arqyly Ortalyq Azııa, Parsy shyǵanaǵy elderi, Qıyr Shyǵys baǵyttary, sondaı-aq Transkaspıı baǵyty boıynsha shamamen 1 mln konteıner tasymaldanady, bul ótken jyldaǵy kórsetkishpen salystyrǵanda 25%-ǵa artyq.
«EYU keńistiginde bir-birimen básekelespeıtin, birin-biri tolyqtyratyn kóliktik tranzıttik dálizderdi qalyptastyrý elderimizdiń ornyqtylyǵyn arttyrý men ekonomıkalaryn bolashaqta damytýdyń negizgi sharttarynyń biri», — dedi A. Mamın.
Úkimet basshysy sondaı-aq EYU elderiniń joǵary deńgeıdegi kólik-tranzıttik saıasat jónindegi arnaıy keńesin qurý bastamasyn kóterdi, onyń sheshimderi atalǵan salanyń ózekti máseleleri boıynsha kelisilgen saıasatty ázirleýge negiz bolady.
A. Mamın COVID-19 syn-tegeýrinderin jáne pandemııadan keıingi kezeńniń strategııalyq mindetterin eskere otyryp, EYU ekonomıkalaryn kooperatsııalyq damytý strategııasyn ázirleýdi usyndy.
EYU sammıtine Túrikmenstan Prezıdenti Gýrbangýly Berdymýhamedov, Ázerbaıjan Prezıdenti Ilham Alıev, Iran Prezıdenti Ibragım Raısı, Qyrǵyzstan Prezıdenti Sadyr Japarov, Tájikstan Prezıdenti Emomalı Rahmon, Túrkııa Prezıdenti Rejep Taıyp Erdoǵan, Ózbekstan Prezıdenti Shavkat Mırzıeev, Pákistan Prezıdenti Arıf Alvı qatysty.
Sammıt qorytyndysy boıynsha Ashhabad deklaratsııasy qabyldandy, sondaı-aq 5 nomınatsııa boıynsha EYU marapattaý rásimi ótkizildi. «Tarıh, mádenıet, ádebıet jáne beıneleý óneri» sanatynda Qazaqstandaǵy antropologııanyń negizin qalaýshy, tarıh ǵylymdarynyń doktory, QR UǴA akademıgi, Bolon ǵylym akademııasynyń korrespondent-múshesi Orazaq Smaǵulov jeńimpaz atandy.
QR Premer-Mınıstri A. Mamınniń Túrikmenstan Prezıdenti G. Berdymýhamedovpen kezdesýi barysynda eki eldiń saýda-ekonomıkalyq, ınvestıtsııalyq, energetıkalyq, tranzıttik-kólik jáne aýyl sharýashylyǵy salalaryndaǵy yntymaqtastyǵynyń ózekti máseleleri talqylandy.
QR Prezıdenti Qasym-Jomart Toqaevtyń 2021 jylǵy 24-25 qazandaǵy Túrikmenstanǵa memlekettik sapary barysynda qol jetkizilgen ýaǵdalastyqtardy iske asyrýǵa erekshe nazar aýdaryldy.
Karantındik sharalarǵa jáne álemdegi qazirgi jaǵdaıǵa qaramastan, Qazaqstannyń Túrikmenstanmen saýda deńgeıi turaqty ósimdi saqtap qaldy — 2021 jylǵy qańtar-qyrkúıekte taýar aınalymy QR eksportynyń 78,1%-ǵa ósýi esebinen 43,6%-ǵa $144 mln-ǵa deıin ulǵaıdy. Taıaý jyldary taýar aınalymyn $500 mln deńgeıinde qamtamasyz etý mindeti qoıyldy.
2021 jyldyń 10 aıynda Qazaqstan men Túrikmenstan temir joldarynyń, sonyń ishinde Aýǵanstan men Iranǵa tranzıttik joldardyń qatysýymen júk tasymalynyń kólemi 1 mln tonnadan asty.
Sondaı-aq Ashhabad qalasyna sapary aıasynda QR Premer-Mınıstri A. Mamın Túrikmenstan mınıstrler kabıneti tóraǵasynyń orynbasarlary Serdar Berdymýhamedovpen jáne Shahym Abdrahmanovpen jekelegen kelissózder júrgizdi, olardyń barysynda ekonomıkalyq yntymaqtastyqty odan ári tereńdetýdiń praktıkalyq sharalary qaraldy.
