Asqar Mamın Arys qalasyn qalpyna keltirý jumystarymen tanysty

ARYS. QazAqparat – QR Premer-Mınıstri Asqar Mamın Arys qalasyna kelip, jarylystan keıingi qalpyna keltirý jumystarymen tanysty. Úkimet basshysy qurylys jumystaryna tartylǵan birqatar oblys pen aýdandarǵa qarasty sektorlardy aralap kórdi, dep habarlaıdy QazAqparat tilshisi.

Arystyqtarǵa apta saıyn kelýge ýáde bergen Úkimet basshysy Mańǵystaý oblysy men Saıram aýdanyna tıesili aýmaqtaǵy atqarylyp jatqan jumystardy kórip shyqty. Jergilikti turǵyndarmen kezdesip, máselelerin tyńdady. Jergilikti halyq qınalǵan sátte bir kisideı jumylyp, qoldaý bildirgen barsha qazaqstandyqtarǵa sheksiz alǵystaryn bildirdi.

Aıta keteıik, Mańǵystaý oblysy men Saıram aýdanyna bekitilgen sektorda jalpy sany 331 turǵyn úı bar bolsa, sonyń 279-yna jóndeý jumystary júrgizilýde. Onyń ishinde 4 úı jańadan salynbaq. Qazir munda zaqym kelgen úılerdi qalpyna keltirý jumystaryn ýaqtyly aıaqtaý úshin qurylysshylar baryn salýda. Aptap ystyqqa qaramastyn 7 birdeı qurylys kompanııasy men 310 jumysshy kúndiz-túni jumys isteýde. Sol jumystardyń arqasynda búginge deıin 102 baspana jóndeýden ótip, 147 úıde qurylys jumystary júrgizilýde.

Úkimet basshysy munan soń Qostanaı oblysy men Saryaǵash aýdandaryna bekitilgen sektordyń da jumysymen arnaıy tanysty. Munda Úkimet basshysy apat kezinde baspanasy jaramsyz kúıge túsken jergilikti turǵyn Rústembek Qalmahanovtyń úıine baryp, jańadan salynyp jatqan baspananyń qurylysyn kórip shyqty.

Aıta keteıik, búgingi tańda Arys qalasynda 8408 jeke turǵyn úı men 105 kóp qabatty úı bar. Jarylys saldarynan 7171 jeke turǵyn úı men 97 kóp qabatty úıge zaqym kelse, 205 jeke turǵyn úı men 8 kóp qabatty úı jaramsyz dep tanyldy. Arys qalasyn qalpyna keltirý jumystaryn júrgizý úshin 7597 jeke turǵyn úı men 98 kópqabatty úıge aqaý aktileri jasalyp, 4572 jeke úı men 78 kópqabatty úıdiń jóndeý jumystary bastaldy. Sonymen qatar, 107 jeke turǵyn úı men 1 kópqabatty úıdi qaıta soǵý jumystary júrgizilýde. Kúni búginge deıin 1413 úıdiń jóndeý jumystary aıaqtalyp, turǵyndarǵa tapsyryldy. Árbir sektordaǵy jumystardy júrgizý úshin oblys, qalalardan 6441, oblys aýdandarynan 349 jumysshy tartylǵan.

Baspanasyz qalǵan turǵyndarǵa orta mektepten 800 oryn daıyndalyp, olar jatyn orynmen jáne úsh mezgil tamaqpen qamtamasyz etilgen. Búgingi tańda tıisti ortalyqta 106 otbasyndaǵy 371 adam ornalastyrylǵan.

Sondaı-aq, apat bolǵan aýmaqta 66 áleýmettik nysandy qalpyna keltirý «Samuryq-Qazyna» ál-aýqat qoryna tapsyrylǵan. Onyń 54-i bilim, 8-i densaýlyq saqtaý jáne 4-eýi sport nysandary. Áleýmettik ınfraqurylym boıynsha 66 nysanda qurylys jumystary júrgizilýde.