Asqar Mamın AÓK-tegi Investıtsııalyq jobalardy iske asyrý jol kartalaryn daıyndaýdy tapsyrdy

NUR-SULTAN. QazAqparat – Búgin Úkimet otyrysynda QR Premer-Mınıstri Asqar Mamın agroónerkásip keshenindegi Investıtsııalyq jobalardy iske asyrý jol kartalaryn daıyndaýdy tapsyrdy, dep habarlaıdy QazAqparat tilshisi.

«Aýyl sharýashylyǵy mınıstrligi ınvestıtsııalyq jobalardy óńirler bólinisinde iske asyrý boıynsha naqty josparlar aıqyndaǵan. Bizdiń maqsatymyz – óńirlerdiń mamandanýyn eskere otyryp jáne kooperatsııa qaǵıdattarynyń negizinde aýyl sharýashylyǵy ónimin óndirý men óńdeý boıynsha 7 ekojúıeni qurý. Bul et, sút, astyq, maıly daqyldar, jemister, kókónister jáne qant óndirisi», - dedi Asqar Mamın.

Osyǵan baılanysty Úkimet basshysy Aýyl sharýashylyǵy mınıstrligine oblystardyń ákimdikterimen birlesip, eki apta merzimde Investıtsııalyq jobalardy iske asyrý jónindegi jol kartalaryn daıyndaýdy tapsyrdy.

«Ákimder ishki naryqty molyqtyrý jáne aýyl turǵyndaryn jumyspen qamtamasyz etý jónindegi maqsattarǵa qol jetkizý úshin atalǵan jobalardy iske asyrý máselesin erekshe baqylaýǵa alsyn. Bizdiń agroónerkásiptik keshen salasyn tabysty damytý men «Nur Otan» partııasynyń baǵdarlamasyn iske asyrý jónindegi josparlarymyz osyǵan baılanysty», - dedi Premer-Mınıstr.