Asqar Mamın amerıkalyq iri kompanııalardyń basshylarymen kezdesti

NUR-SULTAN. QazAqparat - QR Premer-Mınıstri Asqar Mamın iri amerıkalyq aýyl sharýashylyǵy kompanııalarynyń basshylary: Tyson Foods prezıdenti S. Stoýffermen, Valmont Irrigation prezıdenti M. Leonardpen, AGCO vıtse-prezıdenti T. Ýılkımen kezdesý ótkizdi. Bul týraly primeminister.kz silteme jasap QazAqparat habarlaıdy.

Kezdesýde QR Tuńǵysh Prezıdenti – Elbasy Nursultan Nazarbaevtyń 2018 jyly AQSh-qa resmı sapary barysynda qol jetkizilgen kelisimderdi iske asyrý aıasynda agroónerkásiptik keshen salasyndaǵy yntymaqtastyqty damytý máseleleri talqylandy.

Búginde qýattylyǵy aýysymyna 2000 basqa deıin iri qara mal basyn quraıtyn et óńdeý kombınatyn, mal bordaqylaý ortalyqtaryn, balyq sharýashylyǵy keshenin, agrobıznesparkti, ırrıgatsııalyq júıeler óndiretin zaýytty salý boıynsha jańa birlesken jobalardy iske asyrý pysyqtalyp jatyr. Barlyq jobalar álemdik standarttarǵa saı keletin ozyq tehnologııalarmen jabdyqtalatyn bolady.

Kompanııalardyń ókilderi Qazaqstannyń agroónerkásiptik salasyndaǵy ilgerileýdi atap ótip, birlesken óndiristerdiń zor áleýeti baryn aıtty. Qazaqstannyń geografııalyq jaǵynan tıimdi ornalasýy kompanııalar aldynda jańa ótkizý naryqtaryn ashyp otyr, onyń ishinde EAEO, Ortalyq Azııa elderi jáne QHR bar.

QR Premer-Mınıstri A. Mamın, óz kezeginde, Qazaqstan Úkimetiniń agroónerkásiptik sektordaǵy qazaqstandyq-amerıkalyq yntymaqtastyqqa jan-jaqty qoldaý kórsetetinin habarlady.

Kezdesýge QR-daǵy AQSh elshisi Ý. Mozer, AQSh-taǵy QR elshisi E. Qazyhanov, aýyl sharýashylyǵy mınıstri S. Omarov jáne t.b. qatysty.