Asqar Mamın Almaty oblysynyń damý máseleleri jóninde keńes ótkizdi
Óńir ákimi Amandyq Batalov Almaty oblysyn damytýdyń ózekti máseleleri týraly baıandady, dep habarlaıdy QazAqparat Úkimettiń resmı saıtyna silteme jasap.
Talqylaýǵa Premer-Mınıstrdiń birinshi orynbasary Álıhan Smaıylov, Strategııalyq josparlaý jáne reformalar agenttiginiń tóraǵasy Qaırat Kelimbetov, Ulttyq ekonomıka mınıstri Áset Erǵalıev, Energetıka mınıstri Nurlan Noǵaev, Ekologııa, geologııa jáne tabıǵı resýrstar mınıstri Maǵzum Myrzaǵalıev, Saýda jáne ıntegratsııa mınıstri Baqyt Sultanov, Densaýlyq saqtaý mınıstri Alekseı Tsoı, Indýstrııa jáne ınfraqurylymdyq damý birinshi vıtse-mınıstri Qaıyrbek Óskenbaev, Qarjy birinshi vıtse-mınıstri Berik Sholpanqulov, Mádenıet jáne sport vıtse-mınıstri Ǵabıdolla Ábdirahymov qatysty.
Kólik jáne turǵyn úı ınfraqurylymyn damytý, týrızm jáne ınvestıtsııalar tartý, qorshaǵan ortany qorǵaý, óńirde «Aýyl – El besigi» jobasyn iske asyrý máseleleri qaraldy.
2030 jylǵa deıingi Almaty aglomeratsııasyn damytýdyń óńiraralyq is-sharalar josparyn iske asyrý máselesine erekshe nazar aýdaryldy. 2020 jyldyń qorytyndysy boıynsha oblysta ónerkásip óndirisiniń kólemi 2019 jylmen salystyrǵanda 2,3%-ǵa, 1,3 trln teńgege deıin, onyń ishinde óńdeý ónerkásibi 2,7%-ǵa (mashına jasaý 31%-ǵa, farmatsevtıka 10%-ǵa, tamaq ónimderi 3,5%-ǵa, sýsyndar 2,3%-ǵa, qaǵaz óndirisi 1,1%-ǵa) ósti. Aýyl sharýashylyǵynyń jalpy ónimi 2,3% ósimmen 917,8 mlrd teńgege jetti. Aýyl sharýashylyǵy daqyldarynyń egistik alqaptary 6,9 myń gektarǵa ulǵaıyp, 968,5 myń ga qurady. Mal basy 5,1%-ǵa artty, et jáne sút óndirisi tıisinshe 2,2%-ǵa jáne 3,2%-ǵa ósti. Negizgi kapıtalǵa salynǵan ınvestıtsııalar 4%-ǵa 680,7 mlrd teńgege deıin ósti. Qurylys jumystarynyń kólemi 310,2 mlrd teńgeni qurady (+6,8%), 957 myń sharshy metrden astam turǵyn úı paıdalanýǵa berildi (+6,9%).
Búgingi tańda oblystyń ınvestıtsııalyq portfeline 44 myńnan astam jańa jumys oryndaryn qura otyryp, 5,4 trln teńgege 546 joba kiredi. Bıyl 3 myńnan astam jańa jumys ornyn asha otyryp, 118 mlrd teńgege 62 jobany iske asyrý josparlanýda. Almaty oblysynyń Іle aýdanynda jalpy qýaty jylyna 220 myń tonna bolatyn eki qoqys óńdeý zaýytynyń qurylysy bastalady. 2020 jyly týrızm salasyndaǵy negizgi kapıtalǵa salynǵan ınvestıtsııalar 21 mlrd teńgeni qurady, bul respýblıkalyq kólemniń 14,5%-yn quraıdy. Bıyl oblysta 685 km týrıstik marshrýt pen soqpaqtardy abattandyrý, 2,6 mlrd teńge somasyna týrısterdi ornalastyratyn 18 oryndy paıdalanýǵa berý josparlanǵan.
«Almaty oblysy ekonomıkasynyń negizgi sektorlarynda oń damý dınamıkasy saqtaldy. Óńir AÓK, kólik jáne logıstıka, týrızm jáne ónerkásip salalarynda eleýli áleýetke ıe. Oblys Almaty qalasynyń azyq-túlik beldeýi bolyp sanalady. Jańa jobalarǵa salynatyn ınvestıtsııalar kólemin arttyrý arqyly Almaty oblysyn odan ári damytýǵa edáýir serpin berý qajet», — dedi A. Mamın.
