Asqar Mamın: Álemdik saýda protsesterin tejeýshi basty faktordyń biri – koronavırýs bolyp tur
NUR-SULTAN. QazAqparat – Elordad otandyq kásipkerlerdi qoldaý tetikterin talqylaý maqsatynda «Samruk Business Forum» sharasy bastaldy, dep habarlaıdy QazAqparat tilshisi.
Jıynǵa Úkimet basshysy Asqar Mamın, «Samuryq-Qazyna» UÁQ» AQ basqarma tóraǵasy Ahmetjan Esimov, «Atameken» UKP basqarma tóraǵasy Abylaı Myrzahmetov qatysýda.
«Damyǵan elderdiń ónerkásiptik jáne saýda boıynsha protektsıonızmderin baqylaı otyryp, álemdik ekonomıkanyń qubylmaly sıpaty saqtalyp turǵanyn baıqaımyz. Byltyr álemdik saýdanyń ósý qarqyny 1 paıyzǵa tómendep, keıingi jyldardaǵy eń tómengi kórsetkishti kórsetti. Ókinishke qaraı álemdik saýda jáne ónerkásiptik protsesterin tejeýshi basty faktordyń biri – koronavırýs bolyp tur. Bedeldi qarjy ınstıtýttary álemdik ekonomıkanyń 2020 jyly 2,8 paıyzǵa quldyraıtynyn boljaıdy. Bul – 2009 jylǵy qarjylyq daǵdarystan keıingi eń tómengi kórsetkish», - dedi Asqar Mamın forýmnyń ashylýynda.
Úkimet basshysynyń aıtýynsha Qazaqstannyń barlyq iri saýda seriktesterinde ósim qarqyny tómendeıtini jaıly boljam bar.
«Syrtqy suranystyń aıtarlyqtaı tómendeýine baılanysty ishki jáne syrtqy naryqta básekeniń qyza túseri anyq. Osyǵan baılanysty biz qosymsha sharalardy qabyldap, óndiris pen jumys oryndaryn saqtap qalýymyz kerek. Sıngapýr, Japonııa, Ońtústik Koreıa, AQSh, Germanııa qatarly ekonomıkasy damyǵan memleketterdiń tájirıbesi kórsetip otyrǵandaı ulttyq ekonomıkanyń turaqty ósimi ishki óndiris pen ónerkásiptik ózin-ózi qamtý deńgeıine qaraı qalyptasady. Sonymen qatar shaǵyn jáne orta bıznes salasyndaǵy kásiporyndardyń arasyndaǵy tyǵyz kooperatsııa – mańyzdy qadamdardyń biri. Búgingi forýmǵa shaǵyn jáne orta bıznes salasyndaǵy 200-ge tarta kásiporynnyń ókilderi qatysýda. Osylaısha tapsyrys berýshi men ulttyq kompanııalar, óndirýshiler arasyndaǵy dıalog ornatylýda», - dedi ol.
Asqar Mamın «Samuryq-Qazyna» qory el ekonomıkasyn damytýǵa eleýli úles qosyp otyrǵanyn aıtyp ótti.
«Jyl saıyn satyp alý kólemi 4 trln teńgege jetip otyr. Bul rette osy kólemdi ishki naryqtyń múddesine tıimdi túrde paıdalaný bilý kerek. «Samuryq-Qazyna» qorynyń shaǵyn jáne orta bıznes salasynda áleýeti úlken. Qordyń árbir enshiles kompanııasynyń ózindik mańyzy bar. Keıbiri óz aımaqtarynyń basty kompanııalaryna aınalyp otyr. Osyǵan baılanysty Úkimet óńdeý ónerkásibi salasynda otandyq óndiris áleýetin damytý boıynsha josparly jumysty jalǵastyryp keledi. Uzaq merzimdi kelisimder men mehanımzder jumys istep tur», - dedi Premer-mınıstr.
