Asqar Mamın aldaǵy jylytý maýsymyna daıyndyqty kúsheıtýdi tapsyrdy
NUR-SULTAN. QazAqparat – Úkimet basshysy Asqar Mamın aldaǵy jylytý maýsymyna daıyndyq sharalaryn kúsheıtýdi tapsyrdy, dep habarlaıdy QazAqparat tilshisi.
«Jalpy ótken jyldyń jylytý maýsymy qalypty rejımde ótti. Ákimdikter aldaǵy jylytý maýsymyna daıyndyq sharalaryn kúsheıtip, anyqtalǵan kemshilikter men eskertýlerdi joıýýy kerek», - dedi Asqar Mamın Úkimet otyrysynda.
Premer-mınıstr osyǵan oraı jaýapty memlekettik organdar men ákimdikterge birqatar tapsyrma berdi.
«Birinshi – jylytý maýsymy bastalǵanǵa deıin barlyq turǵyn úı kommýnaldyq sharýashylyq nysandary, ásirese densaýlyq saqtaý men áleýmettik saladaǵy nysandardyń, úılerdiń daıyndyǵyn qamtamasyz etý qajet. Ekinshiden, josparlanǵan barlyq jóndeý jumysyn bekitilgen kestege sáıkes aıaqtańyzdar. Halyqty kómirmen jylytý ortalyqtary jáne qazandyqtarmen qajetti kólemde aldyn ala qamtamasyz etý jumystaryn uıymdastyrý kerek. Kómir baǵasyn erekshe baqylaýǵa alý qajet. Otynnyń, ásirese kómir baǵasyn negizsiz ósýine jol bermeý úshin tıisti sharalar qabyldańyzdar», - dedi ol.
Asqar Mamın ákimdikterge tutynýshylardyń 1 naýryzyna deıin qalyptasqan kommýnaldyq qyzmetter úshin kredıtorlyq bereshekterin azaıtý sharalaryn qabyldaýdy tapsyrdy.
«Taǵy bir másele – ıesiz qalǵan elektr jelilerin anyqtap, balansqa alýdy, sondaı-aq kommýnaldyq uıymdardyń balansyna berý jumysyn jalǵastyryńyzdar. Sonymen qatar Indýstrııa jáne ınfraqurylymdyq damý men Energetıka mınıstrlikteri aldaǵy jylytý maýsym barysyn baqylaý men monıtorıngteý jumysyn qamtamasyz etsin», - dedi Asqar Mamın.
