Asqar Mamın ákimderge eskertý jasady
«QR Tuńǵysh Prezıdenti Nursultan Nazarbaev belgilep bergen strategııalyq mindet - halyqtyń tabysy men turmys sapasyn arttyrý. Sondyqtan da áleýmettik mańyzy bar taýarlar baǵasyn turaqtandyrý máselesiniń mańyzy óte zor. Úkimettiń keńeıtilgen otyrysynda Memleket basshysy Qasym-Jomart Toqaev osy baǵytta júıeli sharalardy qabyldaýdy tapsyrdy. Memlekettik organdar men ákimdikter Saýda mınıstrligi usynyp otyrǵan sharalar toptamasyn ýaqytyly ári tolyq oryndaýy tıis», - dedi Úkimet basshysy.
Sonymen birge Premer-Mınıstr birqatar máselege toqtalyp ótti.
«Birinshi, byltyr qarasha aıynda baǵalardy turaqtandyrý jumysynda jibergen kemshilikteri úshin óńir ákimderiniń biraz orynbasary jaýapqa tartylǵan bolatyn. Qabyldanǵan sharalardyń nátıjesinde jeltoqsan aıynda ákimdikter baǵany ustap turý boıynsha jaqsy ózeristerge qol jetkizdi. Mysaly byltyrǵy qarashada áleýmettik mańyzy bar azyq-túlik taýarlarynyń baǵasy 1,1 paıyzǵa ósse, jeltoqsanda bul ósim bar bolǵany 0,1 paıyzdy kórsetti», - dedi ol.
Onyń atap ótýinshe, munyń ózi osy baǵyttaǵy jumysty jalǵastyrý úshin óńirlerde qajetti qordyń bar ekenin kórsetedi.
«Degenmen, qańtardyń sońynda áleýmettik mańyzy bar taýarlardyń baǵasy 0,3 paıyzǵa óskenin kórip otyrmyz. Ákimder baǵanyń ósý máselesin erekshe baqylaýda ustap, ol ózgergen jaǵdaıda jedel sharalardy qabyldaýy tıis ekenin eskertemin», - dedi Asqar Mamın.
Sonymen qatar ol ekinshiden, Saýda jáne ıntegratsııa mınıstrligine Qarjy, Aýyl sharýashylyǵy mınıstrlikterimen birge kóterme satý jáne agro-logıstıkalyq ortalyq qurý jobalaryn qarjylandyrý qurylymyn bir aptanyń ishinde belgileýdi tapsyrdy.
«Úshinshiden, Aýyl sharýashylyǵy mınıstrligi men ákimdikter áleýmettik mańyzy bar azyq-túlik taýarlarynyń óndirisin keńeıtý úshin qajetti jaǵdaı jasaýy tıis. Іshki naryqty otandyq azyq-túlikpen qamtamasyz etý - aýyl sharýashylyǵy taýarlaryn óndirýshiler sýbsıdııa alǵan kezdegi mindettemelerdiń biri bolýy kerek», - dedi Úkimet basshysy.
