Asqar Mamın «100 mektep, 100 aýrýhana» baǵdarlamasymen salynǵan emhanada boldy

NUR-SULTAN. QazAqparat - Qazaqstan Respýblıkasynyń Premer-Mınıstri Asqar Mamın «100 mektep, 100 aýrýhana» memlekettik baǵdarlamasy aıasynda salynǵan, Nur-Sultan qalasyndaǵy №10 qalalyq emhana mysalynda medıtsınalyq qyzmetterdiń sapasy men qoljetimdiligin arttyrý jónindegi jumystyń barysyn tekserdi, dep jazady primeminister.kz.

QR Úkimetiniń basshysy eresekter, balalar jáne ońaltý bólimin, ambýlatorlyq hırýrgııa, qalpyna keltirip emdeý jáne medıtsınalyq ońaltý ortalyqtaryn tekserdi, onda pılottyq rejımde densaýlyq saqtaý salasyndaǵy sońǵy tsıfrlyq sheshimder engizilgen. Bul patsıentterdiń aǵymyn retteý jáne shuǵyl medıtsınalyq kómekti birinshi kezekte kórsetý, dári-dármekpen qamtamasyz etýdiń kiriktirilgen aqparattyq júıesi, qaǵazsyz medıtsınalyq qujattar, onyń ishinde elektrondy densaýlyq pasporttary boıynsha Triage-júıesi. Turǵyndarmen keri baılanys ornatý úshin dárigerlerdiń jumys sapasyn baǵalaıtyn mobıldi qosymsha iske qosylǵan. Emhananyń bas dárigeri G. Alpysbekova aıtqandaı, tsıfrlandyrýdy engizý nátıjesinde kezekke turý 60%-ǵa azaıdy.

Emhanany kórip bitken soń QR Premer-Mınıstri A. Mamınge alǵashqy medıtsınalyq-sanıtarlyq kómek kórsetetin medıtsınalyq uıymdar jelisin qurý jobasy tanystyryldy. Jalpy, shetkeri aımaqtardaǵy turǵyndar úshin medıtsınalyq kómektiń jyldam qoljetimdiligin qamtamasyz etý maqsatynda bıyl Nur-Sultan qalasynda 11 qosymsha medıtsınalyq uıym ashý kózdelgen.

Óz kezeginde, QR densaýlyq saqtaý mınıstri E. Birtanov Elbasynyń «Áleýmettik qamqorlyq» áleýmettik sharalaryn iske asyrý aıasynda bıylǵy 1 maýsymnan bastap ýchaskelik dárigerlerdiń jalaqysy 224 myń teńgege deıin, ortasha medıtsınalyq personaldyń jalaqysy 163 myń teńgege deıin ulǵaıatynyn jetkizdi.