Asqar Ámrın Almaty ákiminiń orynbasary qyzmetinen ketti
ALMATY. KAZINFORM — Asqar Ámrın Almaty ákiminiń orynbasary qyzmetinen ketti. Bul týraly Almaty ákimdiginiń baspasóz qyzmeti rastady.
— 2025 jylǵy 13 tamyzda basqa laýazymǵa aýysýyna baılanysty Asqar Ámrın qala ákiminiń orynbasary qyzmetinen ketti, — delingen habarlamada.
Onyń ornyna kim taǵaıyndalatyny ázirshe habarlanǵan joq.
Asqar Ámrın 1975 jylǵy 1 qańtarda Soltústik Qazaqstan oblysy Poltavka aýylynda týǵan.
Qaraǵandy memlekettik ýnıversıtetiniń zań fakýltetin jáne AQSh-taǵy Cornell Law School oqý ornyn bitirgen.
Ol memlekettik qyzmette Ádilet jáne Qarjy mınıstrlikterinde, Prokýratýra apparatynda, sondaı-aq Astana ákiminiń orynbasary qyzmetterinde jumys istegen.
2022 jyldyń aqpanynan beri Almaty ákiminiń orynbasary retinde sáýlet, qala qurylysy, qalalyq mobıldik, energetıka, sýmen qamtý jáne qarjy salalaryn qadaǵalady.
«Qurmet» jáne «Parasat» ordenderiniń ıegeri.
Eske salaıyq, buǵan deıin Almaty ákiminiń orynbasarlary Álisher Ábdiqadyrov pen Ásem Núsipova qyzmetinen ketken edi.
2025 jylǵy 19 maýsymda Almaty ákiminiń orynbasary laýazymyna Oljas Smaǵulov taǵaıyndaldy.