Asqar Aqaevtyń otbasyna qylmystyq isterdiń qozǵalýyna túsinik berildi
BІShKEK. Kabar-QazAqparat – Qyrǵyz Respýblıkasynyń Bas prokýratýrasyeldiń eks-prezıdenti Asqar Aqaevtyń otbasy músheleri, týystary men jaqyn tanystaryna qatysty qylmystyq is boıynsha buqaralyq aqparat quraldarynda taraǵan aqparattarǵa túsinik berdi. Bul týraly QazAqparat «Kabar» agenttigine silteme jasap habarlaıdy.
Memlekettik komıssııa derekterine sáıkes, quqyqqorǵaý organdary 2005 jyldyń sáýirinen bastap Aqaevtyń otbasy músheleri, týystary men onyń jaqyndaryna qatysty birqatar qylmystyq is qozǵaǵan.
Máselen, memleketke mıllıondaǵan somada zalal keltirgen Maıram Aqaeva basqarǵan «Meerım» qoryna, Aıdar Aqaev, Ádil Toıgonbaev jáne basqa da tulǵalarǵa qatysty qylmystyq ister qozǵalǵan. Keıbir qylmystyq ister boıynsha sot úkimi shyǵaryldy.
Bas prokýratýra prezıdenttiń jubaıy Maıram Aqaeva basqarǵan «Meerım» qaıyrymdylyq qorynyń qyzmetine júrgizilgen tekseris nátıjeleri boıynsha, 30-dan astam qylmystyq is qozǵaǵan. Qor memleketke 64 mln som zalal keltirgen. Memlekettiń menshigine ondaǵan ǵımarat pen basqa da múlikter qaıtaryldy.
Asqar Aqaevtyń burynǵy kúıeý balasy Ádil Toıgonbaev syrttaı 20 jylǵa bas bostandyǵynan aıyrylyp, múlki tárkilendi jáne 166 (alaıaqtyq), 188 (monopolıstik áreket jáne básekelestikke jol bermeý) jáne 213 (salyq tóleýden jaltarý) baptary boıynsha kináli dep tanyldy. Budan bólek, sot ony «Manas» halyqaralyq áýejaıy» AAQ paıdasyna 677,291 mıllıon som ($10 mıllıon) ótemaqy tóleýdi mindettedi.
Burynǵy prezıdenttiń uly Aıdar Aqaevtyń ústinen 4 qylmystyq is qozǵaldy. Onyń keltirgen zalaly $3 mıllıon shamasynda. Taǵy 11 qylmystyq is boıynsha onyń kinási dáleldenip otyr.
«Asqar Aqaev pen onyń otbasy atyshýly oqıǵadan keıin Qyrǵyzstannan qashyp ketýine baılanysty, olar jasaǵan qylmys aıasynda qamaýǵa alý túrindegi bultartpaý sharasy belgilendi. Sondaı-aq, myna tulǵalarǵa halyqaralyq izdeý jarııalandy: uly Aıdar Aqaev, kúıeý balasy Ádil Toıgonbaev jáne basqa da týystary», - delingen Bas prokýratýranyń habarlamasynda.
Qyrǵyz Respýblıkasynyń zańnamasyna sáıkes, qylmyskerler qylmys jasalǵan jerde jazaǵa tartylady. Qyrǵyz Respýblıkasynyń azamattary sanalatyn tulǵalarǵa basqa memlekettiń azamattyǵynyń berilýi zańsyz dep tanylady. Eldiń quqyqqorǵaý organdary Qyrǵyz Respýblıkasynyń zańnamasy jáne ulttyq múddeni qorǵaý aıasynda tergeýdi jalǵastyryp jatyr.
