Asqar Ábdildaev «Shahter» FK-nyń dırektory bolyp taǵaıyndalady
ASTANA. QazAqparat - «Shahter» fýtbol klýby» AQ-da kadrlyq ózgerister boldy. Vladımır Nıdergaýs densaýlyq jaǵdaıyna baılanysty klýbtyń atqarýshy dırektory qyzmetinen ketti.
Dırektordy resmı túrde taǵaıyndaý dúısenbi, 1 aqpanda ótedi. Jańa dırektor qyzmetine Asqar Ábdildaev keledi, dep jazady Sports.kz.
Buǵan deıin ol QFF buqaralyq fýtbol departamentin basqarǵan, QFF baqylaý-tártiptik komıtetiniń tóraǵasy, ÝEFA-nyń jaǵajaıdaǵy fýtbol jáne fýtzal boıynsha komıtetiniń múshesi. Asqar Ábildaev qazaqstandyq fýtbolshy retinde tanymal, ol qaraǵandylyq «Shahter» atynan oınaǵan. Qazaqstandyq Premer-Lıganyń úzdik forvardtarynyń biri boldy. 2008-2010 jyldary «Shahter» fýtbol klýbyn basqarǵan.
Fýtbolshy retinde jetistikteri:
Qazaqstan chempıony, 1992
Qazaqstan chempıonatynyń kúmis júldegeri, 1994
Qazaqstan Kýbogynyń ıegeri, 1992
Qazaqstan chempıonatynyń qola júldegeri, 1995
«Shahter» FK-nyń dırektory retinde jetistikteri:
Qazaqstan chempıonatynyń qola júldegeri, 2009
Qazaqstan Kýbogynyń fınalısteri, 2009,2010.
