Asyraýshysynan aıyrylǵandarǵa tólem toqtasa, qandaı kómek saqtalady
ASTANA. KAZINFORM — Jaqyn adamynan aıyrylý – kez kelgen otbasy úshin aýyr synaq. Ásirese qaıtys bolǵan adam otbasynyń negizgi asyraýshysy bolyp, otbasy tabysynyń edáýir bóligin qamtamasyz etken jaǵdaıda, onyń salmaǵy odan ári arta túsedi. Osyndaı jaǵdaıda otbasynyń óz kúnkórisin qamtamasyz ete almaıtyn múshelerine memleket tarapynan asyraýshysynan aıyrylýyna baılanysty áleýmettik tólemder qarastyrylǵan.
Týa bitken múgedektigi bar azamattarǵa da jekelegen qoldaý sharalary kórsetiledi. Atap aıtqanda, olarǵa asyraýshysynan aıyrylýyna baılanysty járdemaqy mólsherinde qosymsha tólem belgilenedi. Bul qosymsha tólem kámelet jasyna tolǵanǵa deıin, al oqýyn jalǵastyrǵan jaǵdaıda – oqý ornyn aıaqtaǵanǵa deıin, biraq 23 jastan aspaıtyn merzimge tólenedi.
Belgilengen jasqa tolǵannan nemese oqýyn aıaqtaǵannan keıin atalǵan qosymsha tólem zańnamaǵa sáıkes toqtatylady. Alaıda belgili bir tólemniń toqtatylýy memlekettik qoldaýdyń tolyq toqtaǵanyn bildirmeıdi.
Azamattyń jeke qajettilikterine qaraı zańnamada kózdelgen áleýmettik qorǵaý sharalary odan ári de kórsetile beredi. Olardyń qatarynda abılıtatsııalaý men ońaltýdyń jeke baǵdarlamasyna sáıkes usynylatyn ońaltýdyń tehnıkalyq quraldary men qyzmetteri bar.
Turaqty kútimdi qajet etetin azamattarǵa arnaýly áleýmettik qyzmetter de kórsetiledi. Olar arnaýly áleýmettik qyzmetter usynatyn uıymdarda da, úı jaǵdaıynda da kórsetilýi múmkin.
Osylaısha, áleýmettik qorǵaý júıesi azamattyń ómirlik jaǵdaıyn, densaýlyq jaǵdaıyn jáne jeke qajettilikterin eskere otyryp, qoldaýdyń túrli tetikterin qarastyrady.
Aıta ketelik árbir otbasynyń ál-aýqaty aı saıyn tekseriledi: Járdemaqy qalaı ózgeretini týraly jazǵan edik.
