Asyraýshysynan aıyrylǵandarǵa tólem qaı kezde toqtatylady
ASTANA. KAZINFORM — Asyraýshysynan aıyrylǵan otbasy múshelerine memleket tarapynan áleýmettik tólemder qarastyrylǵan. Ásirese otbasynyń negizgi asyraýshysynan aıyrylǵan jaǵdaıda, memleket zańnamaǵa sáıkes qajetti qoldaý kórsetedi.
Eńbek jáne halyqty áleýmettik qorǵaý mınıstrligi baspasóz qyzmetiniń málimetinshe, týa bitken múgedektigi bar azamattarǵa da qosymsha áleýmettik qoldaý sharalary qarastyrylǵan. Atap aıtqanda, olarǵa asyraýshysynan aıyrylýyna baılanysty járdemaqy mólsherinde qosymsha tólem taǵaıyndalady.
— Bul tólem kámelet jasyna tolǵanǵa deıin, al oqýyn jalǵastyrǵan jaǵdaıda oqýyn aıaqtaǵanǵa deıin beriledi. Alaıda tólem 23 jastan aspaıtyn merzimge taǵaıyndalady. Belgilengen jasqa tolǵannan nemese oqýyn aıaqtaǵannan keıin qosymsha tólem toqtatylady, —delingen vedomstvo habarlamasynda.
Degenmen bul memlekettik qoldaýdyń tolyq toqtatylǵanyn bildirmeıdi. Azamattyń jeke qajettiligine qaraı áleýmettik qorǵaý sharalary odan ári de kórsetiledi. Olardyń qatarynda abılıtatsııalaý men ońaltýdyń jeke baǵdarlamasyna sáıkes ońaltýdyń tehnıkalyq quraldary men qyzmetterin usyný bar.
Turaqty kútimdi qajet etetin azamattarǵa arnaýly áleýmettik qyzmetter de kórsetiledi. Bul qyzmetter arnaıy uıymdarda nemese úı jaǵdaıynda usynylýy múmkin.
Osylaısha, áleýmettik qorǵaý júıesi azamattyń ómirlik jáne densaýlyq jaǵdaıyn, sondaı-aq jeke qajettilikterin eskere otyryp, túrli qoldaý tetikterin qamtıdy.
Osydan buryn asyraýshysynan aıyrylǵan otbasylarǵa tólenetin járdemaqy mólsheri artqanyn jazǵanbyz.
