Asyraýshysynan aıyrylǵan otbasylarǵa tólenetin járdemaqy mólsheri artty

ASTANA. KAZINFORM — 2026 jylǵy qańtardan bastap Astana qalasynda asyraýshysynan aıyrylǵan otbasylarǵa tólenetin memlekettik áleýmettik járdemaqy mólsheri artty. Bul týraly Halyqty áleýmettik qorǵaý salasyndaǵy retteý jáne baqylaý komıtetiniń Astana qalasy boıynsha departament basshysy Asqar Aımaǵanbetov habarlady.

— Járdemaqy eń tómengi kúnkóris deńgeıiniń 10 paıyzǵa ósýine baılanysty qaıta esepteldi. Tólem otbasyndaǵy eńbekke qabiletsiz músheler men balalar sanyna baılanysty belgilenedi: bir bala nemese bir eńbekke qabiletsiz múshe – 46 783 teńge, eki bala – 86 447 teńge, úsh bala – 114 415 teńge, tórt bala – 132 213 teńge, bes bala – 139 841 teńge, - dedi Asqar Aımaǵanbetov.

Onyń aıtýynsha, alty jáne odan da kóp bala bolǵan jaǵdaıda jalpy járdemaqy 152 553 teńge mólsherinde eseptelip, otbasynyń barlyq eńbekke qabiletsiz múshelerine teń úlespen bólinedi.

— Eger balalar ata-anasynyń ekeýinen de aıyrylsa, ár balaǵa aı saıyn 78 311 teńge tólenedi. Sonymen qatar eńbekke qabiletsiz otbasy múshesine 31 528 teńge qarastyrylǵan. Bul soma belgilengen shekten aspaıdy, - dedi departament basshysy.

Sonymen qatar qaıtys bolǵan asyraýshy mindetti áleýmettik saqtandyrý júıesiniń qatysýshysy bolsa, memlekettik járdemaqydan bólek Memlekettik áleýmettik saqtandyrý qorynan qosymsha tólem qarastyrylǵan.

— 2026 jylǵy 1 qańtardaǵy jaǵdaı boıynsha Astana qalasynda asyraýshysynan aıyrylý boıynsha áleýmettik tólem 4 285 adamǵa taǵaıyndaldy. Ortasha tólem mólsheri 67 150 teńge, - dep tolyqtyrdy Asqar Aımaǵanbetov.

Aıta keteıik, buǵan deıin múmkindigi shekteýli balalarǵa tólenetin járdemaqynyń mólsheri artqany habarlanǵan edi.