Qazaqstanda jarty mln adam múgedektigi úshin járdemaqy alady
ASTANA. KAZINFORM — Jyl basynan beri múgedektigi boıynsha jáne asyraýshysynan aıyrylýyna baılanysty memlekettik áleýmettik járdemaqy tóleýge respýblıkalyq bıýdjetten 255,5 mlrd teńge jumsaldy. Buǵan qosymsha Memlekettik áleýmettik saqtandyrý qorynan eńbekke qabiletinen jáne asyraýshysynan aıyrylǵandarǵa shamamen 33,5 mlrd teńge áleýmettik tólem jasaldy.
1 maýsymdaǵy jaǵdaı boıynsha múgedektigi boıynsha MÁJ alýshylar sany — shamamen 541,8 myń, asyraýshysynan aıyrylǵandar — shamamen 198,2 myń adam.
Múgedektigi boıynsha memlekettik áleýmettik járdemaqy múgedektiktiń tobyna jáne sebebine, sondaı-aq tıisti qarjy jylyna arnalǵan «Respýblıkalyq bıýdjet týraly» zańda belgilengen eń tómen kúnkóris deńgeıiniń shamasyna baılanysty bolady.
Asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri qaıtys bolǵan asyraýshynyń asyraýyndaǵy adamdardyń sanyna, qaıtys bolý sebepterine jáne eń tómen kúnkóris deńgeıine baılanysty bolady.
Budan basqa, mindetti áleýmettik saqtandyrý júıesine qatysýshylarǵa áleýmettik táýekelder týyndaǵan jaǵdaıda MÁSQ-ten áleýmettik tólem jasalady.
Máselen, 2024 jylǵy 1 maýsymdaǵy jaǵdaı boıynsha 93,7 myń adam eńbek etý qabiletinen aıyrylyp, al 62,8 myńǵa jýyq otbasy asyraýshysynan aıyrylýyna baılanysty áleýmettik tólem aldy.
Tólem mólsheri mynalarǵa baılanysty: sońǵy 2 jyldaǵy MÁSQ-ke áleýmettik aýdarym júrgizilgen ortasha aılyq tabys, eńbekke qabiletinen aıyrylý koeffıtsıentteri, asyraýyndaǵy adam sany, mindetti áleýmettik saqtandyrý júıesine qatysý ótili jáne tabysty aýystyrý.
Bul tólemder respýblıkalyq bıýdjetten tólenetin uqsas járdemaqylarǵa qosymsha júzege asady.
2024 jylǵy 1 qańtardan bastap múgedektigi boıynsha jáne asyraýshysynan aıyrylý jaǵdaıy boıynsha memlekettik áleýmettik járdemaqy mólsheri eń tómen kúnkóris deńgeıiniń ulǵaıýyna baılanysty 7% ósti.
QR Úkimetiniń sheshimi boıynsha eńbekke qabiletinen jáne asyraýshysynan aıyrylý boıynsha MÁSQ-ten tólenetin tólem mólsheri de 7% artty.
Máselen, osy jyly jalpy aýrýdan múgedektigi boıynsha MÁJ mólsheri 1 top úshin — 95 496 teńge, 2 top úshin — 76 397 teńge, 3 top úshin — 52 089 teńge.
1 maýsymdaǵy jaǵdaı boıynsha eńbekke qabiletinen aıyrylý boıynsha áleýmettik tólemniń ortasha mólsheri — 57 090 teńge, asyraýshysynan aıyrylý boıynsha — 58 738 teńge.
