Asyrap alǵan jetkinshekterdi kóbine týystary balalar úıine qaıtarady

ASTANA. KAZINFORM – Asyrap alǵan jasóspirimderdi kóbine týystary qaıtadan balalar úıine tapsyryp jatady. Bul týraly Májilistiń jalpy otyrysynda Oqý-aǵartý vıtse-mınıstri Edil Ospan málim etti. 

«Qazaqstanda bala asyrap alǵysy keletinder sany jyl saıyn kóbeıip keledi. Biraq asyrap alynǵan jetkinshekterdi balalar úıine qaıtarý kórsetkishi azaımaı tur. Máselen, keıingi 5 jylda qaıtarylǵan balalar sany 64 paıyzǵa ósti. 2020 jyly 160 bala, 2021 jyly – 197, al 2022 jyly 217 jetkinshekti balalar úıine qaıtarǵan. Osy kórsetkishtiń ósýine ne sebep?», - dep surady Májilis depýtaty Erbolat Saýryqov.

Óz kezeginde vıtse-mınıstr E. Ospan atalǵan derekterdi rastady.

«Bala asyrap alýshylardyń keıbiriniń biraz ýaqyttan keıin jetkinshekterdi balalar úıine qaıtarý faktileri bar. Bul kórsetkishtiń óskenin rastaımyz. Bul máselege jasalǵan taldaýǵa toqtalsaq, negizinen balalardy týystary asyrap alǵan jaǵdaıda, qaıtarý oqıǵalary bolyp jatady. 13-18 jas aralyǵynda sol jasóspirimderdi kóbine týystary qaıtadan balalar úıine tapsyrady. Atap aıtqanda, qazir Parlament Májilisiniń qaraýynda balalardyń quqyǵyn qorǵaý týraly zań bar. Osy qujat aıasynda kásibı asyrap alýshy otbasy ınstıtýty engizilip jatyr. Bul ınstıtýt máseleni sheshýge septigin tıgizedi dep oılamyz, sebebi kóbine balalardy asyrap alǵan kásibı otbasylarda jetkinshekter turaqty túrde qalyp jatqanyn baıqadyq. Sol zań boıynsha kez kelgen bala asyrap alýshyǵa arnaıy tájirıbesi bar balalardy qoldaý ortalyǵynyń mamany kómek jasaıdy», - dedi Edil Ospan.