Asyrap alǵan balalaryna jaýyzdyq tanytqan emshige qatysty is sotqa kelip tústi
ShYMKENT. KAZINFORM - Asyrap alǵan balalaryna qatygezdik tanytty degen aıyp taǵylǵan emshige qatysty qylmystyq is Shymkent qalasynyń kámeletke tolmaǵandardyń isteri jónindegi mamandandyrylǵan aýdanaralyq sotyna kelip tústi.
Balalarǵa jaýyzdyq tanytty degen kúdikti emshige Qylmystyq istiń 110-baby (Qınaý) jáne 140-babymen (Kámeletke tolmaǵan adamdy tárbıeleý jónindegi mindetterdi oryndamaý) aıyp taǵylyp otyr.
Qalalyq sot baspasóz qyzmetiniń málimetinshe, aldaǵy aptada qoǵamdyq rezonans týdyrǵan qylmystyq isti qaraıtyn sýdıa bekitiledi. Sot protsesi jabyq ótetin bolady.
Biz buǵan deıin Shymkentte jergilikti tanymal emshiniń 6 balany asyrap alyp, olarǵa ıt pen mysyqtyń etin bergenin, úsh jyldan beri azaptap kelgenin jazǵan bolatynbyz. Keıinirek emshi týraly tyń derek shyqty.
Emshi isinen soń bilim salasynyń birqatar qyzmetkeri jazalandy. Sonymen qatar qalalyq densaýlyq saqtaý basqarmasyndaǵylar balalardyń qazirgi jaǵdaıy týraly aıtyp berdi.
Budan ózge KAZINFORM redaktsııasyna emshi asyrap alǵan balalar týraly tyń derek kelip tústi. Ondaǵy málimette búldirshinderdiń biri atalǵan otbasyǵa nebári 1,5 aılyǵynda qamqorlyqqa berilgeni belgili boldy. Qamqorlyqqa berilgen balalardyń arasynda úsh aılyq egizder de bar.
Al balalardyń biriniń ájesi Óskemende turady. Kazinform tilshisi 65 jastaǵy Natalıa Ýstınovamen jolyǵyp, jıen nemeresiniń asyraýǵa qalaı berilgenin surap kórdi.
