Asylov: Stend atýdan árbir jeńis — kópjyldyq eńbek pen naǵyz sporttyq minezdiń nátıjesi

ASTANA. KAZINFORM — Doha qalasynda (Qatar) ótken Azııa chempıonatynda Qazaqstannyń stend atýdan ulttyq quramasy shyn máninde tarıhı nátıjege qol jetkizdi. Bul týraly bas prokýror Berik Asylov aıtty.

Otandyq sport tarıhynda alǵash ret elimizdiń quramalary eresekter arasynda da, jastar quramasy arasynda da bir mezgilde jalpykomandalyq birinshi oryndy ıelendi. Berik Asylovtyń sózinshe, bul jetistiktiń mańyzdylyǵy — stend atý olımpıadalyq sport túrine jatatyndyǵynda. Munda básekelestik deńgeıi óte joǵary, al árbir jeńis — kópjyldyq eńbek, temirdeı tártip pen naǵyz sporttyq minezdiń nátıjesi.

— Sonymen qatar jarys barysynda qazaqstandyq sportshylar úsh birdeı álemdik jáne Azııa rekordtaryn jańartty. Bul — ulttyq mekteptiń daıyndylyǵynyń joǵary deńgeıin jáne halyqaralyq arenada básekege qabiletti ekenin aıqyn dáleldeıdi. Bul tabys — federatsııanyń júıeli jumysynyń, bapkerler shtaby men sportshylardyń birlesken eńbeginiń, tártiptiń, minezdiń jáne ortaq maqsatqa degen senimniń nátıjesi. Quramany laıyqty óner kórsetýlerimen quttyqtaımyn. Alǵa Qazaqstan, — dep jazdy bas prokýror H áleýmettik jelidegi paraqshasynda.

Budan buryn Qazaqstan stend atýdan Azııa chempıonatynda kósh bastaǵanyn jazǵan edik. 21 qańtarda Eleonora Ibragımova, Anastasııa Prılepına jáne Nargıza Sarmanova el qorjynyna altyn medaldi saldy.