Asylhan Asan frıstaıl-akrobatıkadan jasóspirimder arasynda álem chempıony atandy
ASTANA. KAZINFORM — Frıstaıl-akrobatıkadan Qazaqstan quramasynyń ókili Asylhan Asan Aıroloda (Shveıtsarııa) ótip jatqan jasóspirimder arasyndaǵy álem chempıonatynda jeńimpaz atandy. Bul týraly Ulttyq olımpıada komıteti málim etti.
Sportshy jekeleı saıysta úzdik nátıje kórsetti.
Fınalda Asan tóreshilerdiń sheshimimen 103.35 upaı jınady. Osylaısha altynnan alqa taqty.
Onyń komandalasy Dinmuhammed Raıymqulov 92.82 upaımen ekinshi oryn aldy. Al úshinshi oryndy Belarýs ókili Vladıslav Vaznıýk (92.00) ıelendi.
Buǵan deıin Asylhan Asan frıstaıl-akrobatıkadan altyn medal jeńip alǵan bolatyn.
Sońǵy jyldary Qazaqstanda qysqy sport túrlerinen frıstaıl-mogýl jáne frıstaıl-akrobatıkanyń damýy qarqyn alyp keledi. Oǵan basty dádel retinde sportshylarymyzdyń Álem kýbogy jáne qysqy Azııa oıyndary sııaqty halyqaralyq iri dodalarda jeńis tuǵyrynan kórinýin aıtýǵa bolady. Osyǵan oraı, Kazinform tilshisi osy sport túriniń elimizdegi ótkeni men bolashaǵy týraly taldap kórgen edi.
