Asyl tuqymdy sıyr alýǵa 6 paıyzdyq nesıe berý bastaldy

ASTANA. KAZINFORM – 13 naýryzdan beri Asyl tuqymdy iri qara alýǵa 6 paıyzdyq nesıe berilip jatyr. Kepildikke laıyq múlki joq sharýalarǵa memleket «Damý» qory arqyly qoldaý kórsetip, nesıe qunynyń 85 paıyzyna kepildik beredi.

Bul týraly Aýyl sharýashylyǵy mınıstrliginiń Kazinform saýalyna joldaǵan jaýabynda aıtylǵan.

- 2026–2030 jyldarǵa arnalǵan Mal sharýashylyǵyn damytýdyń keshendi jospary aıasynda 13 naýryzdan bastap jyldyq mólsherlemesi 6%-dan aspaıtyn paıyzdyq mólsherlemesimen asyl tuqymdy mal basyn satyp alýǵa baǵyttalǵan «Igilik» jáne «Bereke» atty jańa nesıelik ónimder iske qosyldy. Bul baǵdarlamalar boıynsha «Damý» kásipkerlikti damytý qory» arqyly 85%-ǵa deıin kepildendirý tetigi kózdelgen, - dep jazylǵan resmı jaýapta.

Baǵdarlama operatory – «Agrarlyq nesıe korporatsııasy». 6 paıyzdyq nesıege Qazaqstannyń barlyq óńirlerinen ótinish berýge bolady. Negizgi sharttary mynandaı:

- «Igilik» nesıelik ónimi 100-den 500 basqa deıin asyl tuqymdy mal satyp alýǵa múmkindik beredi.

- «Bereke» nesıelik ónimi iri sharýashylyqtarǵa baǵyttalǵan, 500 jáne odan da kóp bas asyl tuqymdy mal satyp alýǵa arnalǵan.

Kredıt alatyn sharýashylyqtarǵa mynandaı talaptar qoıylady:

- Satyp alynǵan ár maldyń eseptik nómiri bolý kerek;

- mal ustaýǵa arnalǵan qora-jaı bolýy shart;

- mal qorada turǵan kezde (qysta) sýdan tapshylyq bolmaıtynyn dáleldeý kerek;

- jemshóp daıyndaý jáne taratý tehnıkasynyń bolýy;

- aýyl sharýashylyǵy maqsatyndaǵy jer ýchaskeleriniń bolýy.

Jeńildetilgen nesıeden úmitkerlerge qarsy mindettemeler de qoıylyp otyr. Tabıǵı shyǵyndy eseptemegende nesıege alynǵan analyq bastyń bárinen keminde 4 jyl boıy tól alyný kerek.

- «Bereke» baǵdarlamasyna qatysam degenderdiń aýyl sharýashylyǵy salasynda keminde 2 jyl jumys tájirıbesi bolýy talap etiledi. Al «Igilik» baǵdarlamasynda ondaı talaptar qarastyrylmaǵan, - delingen AShM málimetinde.

Eki baǵdarlamanyń da jyldyq paıyzdyq mólsherlemesi 6%-dan aspaıdy. Merzimi – 7 jylǵa deıin. Onyń ishinde alǵashqy 24 aıdy «kanıkýl» retinde paıdalanýǵa bolady.

Eske salsaq, byltyr Aýyl sharýashylyǵy mınıstri Aıdarbek Saparov 2026 jyly nesıege mal alǵandarǵa da memleketten 85 paıyz kepildik beriletinin aıtqan bolatyn.