Asyl tuqymdy iri qara jáne usaq mal basyn áketýge tyıym salý merzimi 6 aıǵa uzardy – VAK
ASTANA. KAZINFORM – 2024 jylǵy 26 shildede Premer-Mınıstrdiń orynbasary Serik Jumanǵarınniń tóraǵalyǵymen Syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııasynyń (VAK) otyrysy ótti.
Talqylaý nátıjesinde Qazaqstan aýmaǵynan ІQM jáne UM analyq basyn áketýge tyıym salýdy 6 aı merzimge uzartý týraly sheshim qabyldandy.
Bul tyıym Qazaqstanda osy jyldyń 8 qańtarynda engizildi. Memlekettiń sút-taýarly fermalaryn aýqymdy salý jáne aýstralııalyq ádispen mal sharýashylyǵyn damytýdy qoldaý jónindegi mindetterdi eskere otyryp, tyıym salýdy taǵy 6 aıǵa uzartý týraly sheshim qabyldandy.
Sonymen qatar kóliktiń barlyq túrimen Qazaqstan aýmaǵyna bıdaı ákelýge tyıym salý jyl sońyna deıin uzartyldy. Elge bıdaıdy «kóleńkeli shema» arqyly ákelý jáne ony Reseı Federatsııasynyń shekaralas aımaqtarynan avtokólikpen keri eksporttaý qaýpi áli de seıilgen joq. Qazaqstanda ótken jylmen salystyrǵanda joǵary bolady dep kútiletin dándi daqyldardy jınaý boljamdary da nazarǵa alyndy.
Sondaı-aq VAK otyrysynda otandyq shyryndar men sýsyndar óndirýshilerin qoldaý maqsatynda órik, almurt jáne shabdaly pıýresin ákelýge arnalǵan kedendik baj salyǵy mólsherlemesin tómendetý maquldandy.
