Asyl tuqymdy mal sharýashylyǵyn damytýǵa baǵyttalǵan «Igilik» baǵdarlamasy bastaý alady
ASTANA. KAZINFORM – Qazaqstan Respýblıkasy Premer-mınıstriniń orynbasary – ulttyq ekonomıka mınıstri Serik Jumanǵarın juma kúni Aqmola oblysyna baryp, «En dala» sharýashylyǵynyń egis alqaptaryndaǵy egin jınaý jumystarymen jáne Tselınograd aýdany Mánshúk aýylyndaǵy 2 myń saýyn sıyrǵa arnalǵan sút-taýarly fermanyń qyzmetimen tanysty. Bul týraly Úkimet málim etti.
Atalǵan sharýashylyq 46 myń ga egistik jerdi óńdeýmen aınalysady. Negizgi daqyldar – bıdaı (25 myń ga) jáne arpa (7 myń ga). Sonymen qatar, maıly daqyldar men mal azyqtyq daqyldar árqaısysy 4 myń ga aýmaqqa egilgen. Sút baǵytynan bólek, munda qazaqtyń aqbas tuqymdy 1,5 myń iri qara maly jáne myńǵa jýyq jylqy ósiredi.
Sharýashylyq basshysy Tımýr Pshenovtyń aıtýynsha, egis alqaptarynyń shamamen 60%-y jınalǵan. Bıdaıdyń ónimdiligi gektaryna 16–17 tsentnerdi, arpanyń ónimdiligi shamamen 16 tsentnerdi qurap otyr. Bıdaıdyń basym bóligi – 1 jáne 2-klassqa tıesili. Sonymen qatar, 3-klass ta bar.
Kezdesýde fermerlerdi mal sharýashylyǵyn qoldaý sharalary qyzyqtyrdy. Aýyl sharýashylyǵy vıtse-mınıstri Amanǵalı Berdalınniń habarlaýynsha, 1 tamyzdan bastap mal sharýashylyǵynda 50 mlrd teńge kóleminde 5%-dyq jyldyq mólsherlememen jeńildetilgen nesıeleýdiń jańa baǵdarlamasy iske qosyldy. Jaqyn ýaqytta joǵary ónimdi asyl tuqymdy mal satyp alýǵa arnalǵan «Igilik» baǵdarlamasy bastalady. Bul mal basynyń ósýin jáne genetıkanyń sapaly jańarýyn qamtamasyz etip, salanyń ónimdiligine oń áserin tıgizedi.
Vıtse-premer sondaı-aq Mánshúk aýylyndaǵy jańa sút-taýarly fermanyń jumysymen tanysty. Jobanyń jalpy quny – 6,2 mlrd teńge. Onyń ishinde 4 mlrd teńge 2,5%-dyq jyldyq mólsherlememen «Úlken joba» aıasynda jeńildetilgen nesıe retinde berilgen.
Búginde fermada 2000 bas saýyn maly bar. Óndiristik qýaty – jylyna 12 myń tonna, táýliktigine – 33 tonna sút. Kásiporynda 70-ten astam jumys orny ashylǵan.
— Aýyl sharýashylyǵy ekonomıkanyń ósý draıverine aınaldy. Onyń JІÓ-degi úlesi shamamen 3,9% bolǵanymen, tasymaldaý, qoımalaý, qaıta óńdeý jáne azyq-túlik óndirisiniń artýy esebinen jıyntyq mýltıplıkatıvti áseri áldeqaıda joǵary. Qazir biz jastardy aýylǵa tartý jáne veterınar mamandyǵyn jan-jaqty qoldaý baǵytynda jumys istep jatyrmyz, — dedi kezdesýdi qorytyndylaǵan Serik Jumanǵarın.
Aıta keteıik, Qazaqstandyq aýyl sharýashylyǵy ónimderi 70-ten astam elge eksporttalady.