«Asyl besik — Aqsýat»: jeńimpazdarǵa kólik pen qomaqty júlde beriledi
SEMEI. KAZINFORM — Sporttyq jarystardaǵy qomaqty júlde, óner men shyǵarmashylyqty tanytý múmkindigi, at sporty boıynsha sheberlikti kórsetý alańy — munyń bári «Asyl besik — Aqsýat» festıvaliniń qatysýshylaryna usynylady.
Festıval 5-7 maýsym aralyǵynda Abaı oblysynyń Aqsýat aýdanynda ótedi. Aýqymdy is-shara sporttyq básekelermen qatar, óner men ulttyq qundylyqtardy nasıhattaýǵa baǵyttalǵan.
Festıval jeńimpazyn baǵaly syılyqtar kútedi. Máselen, 5 maýsym kúni Yrǵyzbaı ata kesenesi mańynda toǵyzqumalaqtan týrnır uıymdastyrylady. Bas júlde — 1 mıllıon teńge. Júlde qory toǵyzynshy orynǵa deıin qarastyrylǵan jáne ár jeńimpazǵa aqshalaı syıaqy beriledi.
At jarysy boıynsha ótetin top báıge men alaman báıgeniń jeńimpazdaryna avtokólik tabystalady. Ekinshi oryn ıegerine — 2,5 mıllıon teńge, úshinshi orynǵa — 1,5 mıllıon teńge kóleminde syıaqy beriledi.
Sondaı-aq festıval aıasynda óńirdiń ár aýdanynan kelgen palýandar kúsh synasady. Ógiz palýan jáne túıe palýan saıysynyń jeńimpazdary da avtokólik ıelenedi. Júldeli ekinshi jáne úshinshi orynǵa aqshalaı syılyq qarastyrylǵan.
«Artyq bilim — kitapta» atty kitap oqý baıqaýynyń jeńimpazdaryna da avtokólik pen aqshalaı júlde tabystalady.
Festıval 7 maýsym kúni qazaqstandyq estrada juldyzdarynyń qatysýymen ótetin aýqymdy gala-kontsertpen qorytyndylanady.
