Asyqtan jasalǵan aspap sheteldikterdi tańǵaldyrdy

ASTANA. KAZINFORM — Kómeımen án salý sheberi Amanjol Nyǵmet asyqtan erekshe aspap jasap, sheteldik tyńdarmandardy tańǵaldyrdy.

— Shetelge konkýrsqa qatysatyn boldyq, onda eshqandaı elektronıka bolmaý kerek degen talap boldy. Osylaısha, asyqtan aspap jasadyq. Ataýy — asqaq. Ataý Asyq federatsııasyndaǵy azamattarmen aqyldasyp qoıyldy. Onyń dybysy erekshe. Sondyqtan shetelderdiń qyzyǵýshylyǵy zor boldy, — dedi Amanjol Nyǵmet Jibek Joly telearnasynyń «Búgin Live» baǵdarlamasynda.

Ónerpaz tek aspap jasaýmen shektelmeı, kómeımen án salý dástúrin keńinen nasıhattap keledi.

— Kómeımen án aıtý — tereń tarıhy bar mura. Muny soǵys jyldary jaýyngerlik rýh berý úshin paıdalanǵan. Qazir ol umytylǵan óner sanalady. Sondyqtan ony jańǵyrtqym keledi. Bul iske 8 jyl buryn kásibı túrde kiristim, — deıdi ol.

Amanjol Nyǵmettiń aıtýynsha, bul ónerge qyzyǵýshylyǵy óziniń daýys ereksheligin baıqaǵan sátten bastalǵan. Sodan beri ol túrli festıvalderge turaqty qatysyp keledi.

— Túrkitektes elder arasynda festıvaldar jıi ótedi. Oǵan qalmaı qatysamyz, — deıdi spıker.

Búginde óner ıesi dástúrli mýzykany zamanaýı tásildermen ushtastyryp, ony áleýmettik jeli arqyly keńinen nasıhattap júr.

— Qyzyǵýshylar kóp. Kóbine shetel, eýropalyqtar bárin bilgisi kelip, surap jatady, — dedi Amanjol Nyǵmet.

Aıta keteıik, Qazaqstanda dombyrany ushaq bortynda alyp júrýge ruqsat etilýi múmkin.