Asyq atýdan alǵashqy el chempıonaty Aqtaýda ótedi

AQTAÝ. KAZINFORM – Aqtaýda naýryzdyń 23-30 kúnderi aralyǵynda ulttyq sport túrleri - «Asyq atý» men «Bes asyqtan» alǵash ret Qazaqstan Respýblıkasynyń chempıonaty ótetin boldy.

Bul týraly Mańǵystaý oblysy boıynsha asyq atýdan aǵa jattyqtyrýshy Ilesbaı Omarov málimdedi.

Onyń aıtýynsha «Asyq atý» jáne «Bes asyq» oıyndaryna 2008-2010, 2011-2013 jyldary týǵan jasóspirimder qatyspaq.

"Óńirimizde alǵash ret ótkeli otyrǵan bul chempıonat ulttyq sport - Asyq atý jáne Bes asyqqa degen qyzyǵýshylyqty arttyryp, aýyl aýdan, qalalarda ulttyq sport túrin damytý, babalardan mıras bolǵan qundylyqtardy ulyqtaý maqsatynda uıymdastyrylyp otyr. Atalmysh dodaǵa respýblıkamyzdyń 18 óńirinen 288 sportshy qatysyp baq synaıdy", - dedi Ilesbaı Omarov.

Ulttyq sporttyń bul túri respýblıkamyzda kásibı sport dárejesine deıin kóterilgen. Qazirdiń ózinde oqýshylar arasynda oıynǵa qyzyǵýshylyq artyp, ulttyq oıynnyń tanymaldyǵy artyp keledi. Oqýshylar arasynda mektep lıgasy, gımnazııa jarystary jyl saıyn ótkizilip keledi.

Sonymen qatar brıfıng barysynda chempıonat kezinde oınalatyn asyq túrleri týraly aıtylyp ótti.

"Asyq alǵashqy kezde kishigirim saqa, súıek, 2016 jyldan beri arqar men quljanyń asyǵyn paıdalandy. Tájikstannan keletin bul irileý kelgen asyq túrin qolqar dep ataıdy. Qoı asyǵynan bir jarym, eki ese iri keletin qulja arqar saqa ornyna júredi. 2019 jyldan beri qaraı plastık asyq shyqty. Salmaǵy 30 grammdy quraıdy. Bıylǵy dodada osy plastık asyq túrimen oınaıdy", - dedi Ilesbaı Omarov.

El chempıonaty Aqtaýdaǵy Sh.Esenov ýnıversıtetiniń sport zalynda 24 naýryz kúni bastalady. 25 naýryz chempıonattyń ashylý saltanatty jıyny ótedi.