AsiaCredit Bank salymshylaryna 13 mlrd teńge tólendi

ALMATY. QazAqparat - Qazaqstannyń depozıtterge kepildik berý qory alǵashqy aptada «AsiaCredit Bank» AQ salymshylaryna kepildik berilgen ótemniń 70% jýyǵyn tóledi, dep habarlaıdy QazAqparat tilshisi.

2021 jyldyń 3 naýryzynadaǵy jaǵdaı boıynsha «AsiaCredit Bank (AzııaKredıt Bank)» AQ 2 511 salymshysy jalpy somasy 13,12 mlrd teńgege kepildik berilgen ótem aldy.

Bul - Qazaqstannyń depozıtterge kepildik berý qory mindettemeleriniń jalpy somasynyń 68,7 paıyzy.

«Agent bank retinde tańdap alynǵan «Eýrazııalyq bank» AQ arqyly «AsiaCredit Bank (AzııaKredıt Bank)» salymshylaryna kepildik ótem tóleý 24 aqpanda bastalǵan bolatyn. Ol 1 mamyrǵa deıin jalǵasady» dep habarlady qordyń baspasóz qyzmeti.

Salymshylar kepildik berilgen ótemdi ózderine yńǵaıly tásilmen: agent banktiń kassasynan qolma-qol aqshamen, sol agent bankte bank shotyn (kartochka) ashý nemese kez kelgen basqa bankke aýdarý arqyly ala alady.

Depozıt boıynsha kepildikter jáne kepildik berilgen ótemdi tóleý týraly jalpy aqparattar qordyń www.kdif.kz saıtynda jarııalanǵan.

Salymshylar aqyl-keńes alý úshin 1460 telefon nómiri, sondaı-aq QDKBQ saıtyndaǵy chat, @kdif_ask Telegram-chaty, qordyń Facebook jáne Instagram áleýmettik jelilerindegi deposit.kz resmı paraqshalary, sondaı-aq [e-mail] elektrondy poshtasyna habarlasa alady.

Eske salaıyq, Qarjy naryǵyn retteý jáne damytý agenttigi basqarmasynyń 11 aqpandaǵy qaýlysyna sáıkes «AsiaCredit Bank» AQ baǵaly qaǵazdar naryǵynda qyzmetti júrgizý lıtsenzııasynan aıyrylǵan bolatyn.