Ashyq júıesindegi jaýapty kásipkerlerge qandaı yntalandyrý kórsetiledi

NUR-SULTAN. QazAqparat – Ashyq júıesimen barlyq azamattardy tirkeıtin jaýapty kásipkerlerge yntalandyrý jasalady. Bul týraly «Atameken» QR Ulttyq kásipkerler palatasynyń basqarma tóraǵasy Abylaı Myrzahmetov aıtyp berdi, dep habarlaıdy QazAqparat tilshisi.

«Qazirgi ýaqytta elimizdegi 16 óńir «qyzyl» aımaqta tur, onyń beseýinde – Nur-Sultan, Shymkent qalalary, Aqtóbe, Aqmola, Qyzylorda oblystarynda jaǵdaı tym kúrdeli. Jańa qaýlyǵa sáıkes, atalǵan bes óńirdegi kásipkerler 2 tamyzdan bastap, tek Ashyq júıesinde ǵana 20:00-ge deıin jumys isteıdi. Bizdiń kelisim boıynsha Ashyq júıesindegi nysandar da, ásirese qyzmet kórsetý salasy demalys kúnderi tolyq toqtatylady. Bul jerde Ashyq júıesimen barlyq azamattardy tirkeıtin óte jaýapty kásipkerlerge yntalandyrý jasaýymyz kerek. Jaýapty kóshbasshylardyń jumys isteý ýaqyty 22:00-ge deıin uzartylady», - dedi spıker Ortalyq kommýnıkatsııalar qyzmetinde.

Onyń aıtýynsha, Densaýlyq saqtaý mınıstrligimen kelisim bar. 9 tamyzda atalǵan bes óńirdegi jaǵdaı qaıta qaralady.

«Onda Ashyq nysandary 22:00-ge deıin, al kóshbasshylar – 00:00-ge deıin jumys isteı alady. Kásipkerler, jaýapty jumys istep tursa, jumystaryn toqtatpaýdy surap otyr. Sondyqtan biz ony durys dep sanaımyz. Bir aptadan keıin epıdemıologııalyq jaǵdaıdy qaıta qaraımyz. Eger bir aptadan keıin osy bes óńirde jaǵdaı jaqsarsa, joba kóshbasshylaryna, atap aıtqanda demalys kúnderi de jumys isteýge ruqsat berý tetikterin qarastyramyz», - dedi A. Myrzahmetov.