Ashyq júıesin qoldana otyryp jaýapkershilikti óz moınymyzǵa alamyz – astanalyq kásipker

NUR-SULTAN. QazAqparat – Búginde elordada Ashyq júıesi keńinen qoldanylyp otyr. Atalǵan júıe memlekettik organdarmen qatar bıznes salasynda da suranysqa ıe. Koronavırýs indetimen kúres pen qaýipsizdikti qamtamasyz etýde Ashyq-ty qoldanýshylardyń biri astanalyq kásipker, meıramhana ıesi Gúlbaný Maıǵarına júıeni qoldanýdaǵy óz tájirıbesin bólisti, dep habarlaıdy QazAqparat tilshisi.

«Biz de basqa elder sekildi pandemııa jaǵdaıynda ómir súrýge tóselip kelemiz. Pandemııa – jahandyq másele, sondyqtan da memleketpen qatar, bıznes ókilderi de sanıtarlyq talaptardy saqtaı otyryp, tirshilik etýi tıis. Iá, pandemııa saldarynan orta jáne shaǵyn bıznes zardap shekkeni ras, degenmen qazir tabys kólemin emes, adam saýlyǵyn oılaıtyn sát. Osy oraıda biz Ashyq júıesine alǵash qosylǵan qatysýshylardyń birimiz. Bıyl qańtar aıynda pılottyq rejimde engizilgen sátten bastap Qoǵamdyq tamaqtaný qaýymdastyǵymen birlesip, restoratorlar arasynda atalǵan júıeni nasıhattap kelemiz», - dedi Gúlbaný Maıǵarına.

Sondaı-aq, kásipker Ashyq júıesin engizýde kedergiler bolǵanyn da jasyrmady.

«Árıne, Ashyq-ty engizýde jumysshylar jáne klıentter tarapynan da belgili bir deńgeıde túsinispeýshilikke tap boldyq. Saldarynan 30 paıyzǵa deıin kelýshilerden aıryldyq. Júıeni engizý aıtarlyqtaı ýaqyt aldy, esesine qazirgi ýaqytta turaqty túrde jumys istep jatyrmyz. Búginde meıramhanalar ishinde Ashyq júıesin engizýde 5 óńir kósh bastap tur, onyń qatarynda Almaty, Qaraǵandy, Pavlodar, Óskemen jáne Semeı bar. Ashyq júıesi - qazirgi ýaqytta qaýipti mártebesi bar adamdardy qoǵamdyq orynǵa kirgizbeýdiń taptyrmas quraly. Ashyq júıesin qoldana otyryp kásipker bar jaýapkershilikti óz moınyna alady. Ol degenimiz - sanıtarlyq talaptardy saqtaı otyryp, adamdardyń qaýipsizdigin qamtamasyz etý», - deıdi ol.

Sonymen qatar, meıramhana ıesi ortaq erejege baǵyna otyryp, indetti jeńý barshamyzǵa qatysty ekenin eske saldy.