Ashyq jobasyna tirkelý talaptary jeńildedi – Abylaı Myrzahmetov

NUR-SULTAN. QazAqparat – Kásipkerlik nysandary Ashyq jobasyna eki kúnde tirkele alady. Bul týraly «Atameken» ulttyq kásipkerler palatasynyń basqarma tóraǵasy Abylaı Myrzahmetov aıtyp berdi, dep habarlaıdy QazAqparat tilshisi.

«Memleket basshysy Ashyq jobasyndaǵy bıýrokratııalyq rásimder týraly oryndy syn aıtty. Biz áriptesterimizben jáne sanıtarlyq dárigerlermen birge taldaý júrgizdik. Onda algorıtm is júzinde daıyn, qaýly júzege asyrylady. Ońtaılandyrý men reınjınırıng protsesteri 7 kúnge sozyldy, óıtkeni sanıtar dárigerlerdiń maquldaýy qajet boldy. Bul - qolmen jasalatyn protsedýra. Ári qaraı bizdiń aımaqtyq ókilderden ruqsat alý kerek boldy. Endi biz bul protsesterdiń bárin alyp tastadyq. Búkil protsester avtomattandyrylady, jobaǵa 2 kún ishinde tirkelýge bolady», - dep túsindirdi Abylaı Myrzahmetov ortalyq kommýnıkatsııalar qyzmetinde.

Onyń aıtýynsha, normatıvtik qujatqa qol qoıylǵannan keıin vedomstvo algorıtmdi jarııalaıdy.

«Bizdiń infokazakhstan platformasynda 450 myńǵa jýyq kásipker tirkelgen, onyń 90% qyzmet kórsetý salasynda jumys isteıdi. Biz karantındi kúsheıtken bes qalada 100 myńǵa jýyq sýbekt, 30-ǵa jýyq qyzmet kórsetý salasy tek Ashyq júıesi boıynsha jumys isteıdi dep josparlap otyrmyz. Erteńnen bastap kásipkerlik nysandaryna, óńirlerdegi jeke kásipkerlerge kómek kórsetiledi», - dedi A. Myrzahmetov.