«Ashyq» jobasyna qatysatyn sýbektiler qataryn keńeıtý usynyldy
NUR-SULTAN. QazAqparat – Bir aptanyń ishinde 5 myńǵa jýyq kásipker «Ashyq» jobasyna qatysýǵa ótinish beretin bolady. Bul týraly Úkimet otyrysynda «Atameken» Ulttyq kásipkerler palatasynyń basqarma tóraǵasy Abylaı Myrzahmetov aıtty, dep habarlaıdy QazAqparat tilshisi.
«Keshegi málimetke qaraǵanda «Ashyq» jobasyna 1658 kásipkerlik sýbektisi qatysyp otyr. Taǵy qosymsha 670 ótinish kelip tústi. Úkimet sheshimimen kesheden bastap bul joba elimizdiń barlyq óńirine taratyldy. Bizdiń esebimiz boıynsha 1 aptanyń ishinde 5 myńǵa jýyq kásipker jobaǵa qatysýǵa ótinish beretin bolady», - dedi Abylaı Myrzahmetov.
Onyń atap ótýinshe, joba Almaty, Nur-Sultan, Qaraǵandy, Taldyqorǵan, Aqtóbe, Taraz qalalarynda jaqsy damyp jatyr.
«Ashyq» jobasyna qyzyǵýshylyq tanytqan barlyq kásipker mobıldik qosymsha arqyly ony qalaı engizýge bolatyndyǵyna qatysty algorıtmmen tanys bola alady. ıAǵnı, kásipkerler kúndelikti aqparat alyp otyr. Qyzyǵýshylyq óte joǵary. Shekteý sharalary kezinde kınoteatrlar jumysy toqtap qalǵan edi. Búginde jobanyń arqasynda 48 óńirde kınoteatrlar jumysyn bastady», - dedi ol.
Sonymen qatar ol balalar demalys lagerleri, balalar saýyqtyrý ortalyqtary, kórmeler, úlken saýda ortalyqtaryndaǵy fýd-kordtar, joǵary oqý oryndary «Ashyq» jobasyna qatysýǵa daıyn ekendigin jáne olarǵa da ruqsat berý qajettigin atap ótti.
