Ashyq jobasy: Kelýshiler «sary/qyzyl» mártebesi boıynsha irikteledi
NUR-SULTAN. QazAqparat – Ashyq jobasyna engizilgen nysandar kelýshilerdiń mártebesin QR kod nemese JSN boıynsha tekseredi, dep habarlaıdy QazAqparat tilshisi.
Bul týraly QR DSM Bas memlekettik sanıtar dárigeri Erlan Qııasovtyń Kásipkerlik obektilerinde «Ashyq» mobıldik qosymshasyn engizý týraly jańa qaýlysymen birge jarııalanǵan 2-qosymshada naqty kórsetilgen.
Ol boıynsha:
«Ashyq» jobasyna engizilgen obektilerde kásipkerlik sýbektisi kelýshilerdiń mártebesin QR kod nemese JSN boıynsha tekseredi.
Kásipker nysan ákimshisi «sary/qyzyl» mártebesi bar oqshaýlanýǵa jatatyn kelýshini anyqtaǵan kezde «sary/qyzyl» mártebesi bar skrınshot usyna otyryp, mobıldi baılanys, elektrondy poshta arqyly Sanıtarııalyq-epıdemıologııalyq baqylaý komıtetiniń aýmaqtyq departamentterine fakti týraly habarlaıdy.
«Jasyl» mártebe – kelýshi derekter bazasynda COVID-19-ǵa teris nátıjemen PTR testileýden ótken retinde belgilengen;
«Kók» mártebe – PTR testileý nátıjesi joq, COVID-19-ben aýyratyn naýqaspen baılanysta bolǵan adam retinde sanalmaıdy;
«Sary» mártebe – derekter bazasynda COVID-19-ben aýyratyn naýqaspen baılanysta bolǵan adam retinde kórsetilgen;
«Qyzyl» mártebe – bazada COVID-19-ǵa PTR-testileýdiń oń nátıjesimen tirkelgen, «aýrý juqtyrǵan» - U 07.2 kody mártebesi bar patsıentter.
Kelýshide smartfon bolmaǵan jaǵdaıda kásipkerlik obektisiniń qyzmetkeri kelýshiniń kelisimimen onyń mártebesin JSN boıynsha aqparattyq júıede tekseredi.
Jobaǵa qatysatyn kásipkerlik obektilerine «sary/qyzyl» mártebesi bar kelýshiler jiberilmeıdi.
Aınalasyndaǵylar úshin qaýipti bolyp tabylatyn aýrýdy jasyrǵan jaǵdaıda, «Ákimshilik quqyq buzýshylyq týraly» Qazaqstan Respýblıkasynyń 2014 jylǵy 5 shildedegi Kodeksine sáıkes ákimshilik jaýapkershilik kózdelgen. Osy tarmaqtyń kúshi «sary» mártebesi bar adamdarǵa qoldanylmaıdy.
Nysanǵa barý faktisi qaıta anyqtalǵan jaǵdaıda jeke tulǵaǵa qatysty ákimshilik sıpattaǵy sharalar qoldanylady.
