«Ashyq» jobasy Almatyǵa 1 aptada «qyzyl» mártebesi bar qansha adam kelgenin anyqtady
Aıtýar Qoshmambetov jobany iske asyrý barysynda ol óziniń tıimdiligin dáleldep, qazirgi ýaqytta kásipkerlerge qatań shekteý sharalaryn qoldanbaı jumys isteýge múmkindik berip jatqanyn aıtty.
«Ózderińiz biletindeı, pılottyq jobaǵa qatysýshylarǵa epıdemıologııalyq jaǵdaıdyń tómen turǵan aımaǵynyń jumysyn shekteý krıterıılerine sáıkes jumys isteýge ruqsat etiledi. Mysaly «qyzyl» aımaqta pılottyq jobaǵa qatysatyn bıznes obektileri «sary» aımaq krıterııleri boıynsha, «sary» aımaqta «jasyl» aımaq krıterııleri boıynsha jumys isteıdi», - dedi ol.
27 sáýirdegi jaǵdaı boıynsha «ASHYQ» qosymshasyn 402 256 qoldanýshy paıdalanatyny belgili boldy. 19 sáýirdegi nátıjelermen salystyrǵanda, ıaǵnı bir apta ishinde qosymshany paıdalanýshylar sany 167 256 kóbeıgen.
«12 sáýirden bastap respýblıka boıynsha «qyzyl» mártebesi bar 849 adam, «sary» mártebesi bar 419 kelýshi osy qosymsha arqyly anyqtaldy. Bul 19 sáýirdegi nátıjelermen salystyrǵanda 574 kelýshige kóp. Sońǵy bir apta ishinde Almaty qalasy boıynsha «sary» jáne «qyzyl» mártebesi bar 116 kelýshi anyqtaldy, - dedi Aıtýar Qoshmambetov.
26 sáýir kúni Nur-Sultan qalasy boıynsha «qyzyl» mártebemen – 25 kelýshi, «sary» mártebemen – 54 kelýshi, Almaty qalasy boıynsha «qyzyl» mártebemen – 9 kelýshi, «sary» mártebemen – 8 kelýshi anyqtalǵan.
Onyń aıtýynsha, «ASHYQ» pılottyq jobasyna qatysýǵa nıet bildirgen kásipkerler sany kún saıyn artyp keledi. Sondaı-aq, qarjy uıymdarynan, joǵary oqý oryndarynan, iri kompanııalardyń keńselerinen joba qatysýshylaryna tıesili jeńildiktersiz qosymshany ornatý múmkindigin qarastyrý jóninde ótinishter túsýde.
