Ashyq-pen mınýt saıyn elimizde myńdaǵan adamnyń mártebesi tekseriledi

NUR-SULTAN. QazAqparat – Ashyq jobasymen elimizdi mınýt saıyn myńdaǵan adamnyń mártebesi tekseriledi. Bul týraly QR Premer-Mınıstriniń orynbasary Eraly Toǵjanov aıtty, dep habarlaıdy QazAqparat tilshisi.

«Ashyq jobasy tıimdi. Ol 9 myńnan astam bıznes sýbektisine pandemııa kezinde jumys isteýge múmkindik berip otyr. 4 mıllıonnan astam paıdalanýshy tirkelgen. Elimizde árbir mınýt saıyn myńdaǵan adamnyń mártebesi tekseriledi. Degenmen, joba keıbir azamattar ózderiniń mártebesin bile tura sanıtarlyq talaptardy buzýyn jalǵastyryp otyrǵanyn kórsetti», - dedi Úkimet basshysynyń orynbasary Ortalyq kommýnıkatsııalar qyzmetindegi brıfıngide.

Eral Toǵjanovtyń aıtýynsha, 2021 jyldyń sáýir aıynan beri Ashyq jobasynyń kómegimen karantın rejımin buzǵan 9,6 myńnan astam adam anyqtalyp otyr.

«Olardyń jartysy PTR testiń oń nátıjesi bar adamdar», - dedi Premer-Mınıstrdiń orynbasary.