Ashyq qosymshasyn Egov mobıldi bazasymen sáıkestendirý qajet

NUR-SULTAN. QazAqparat – «Ashyq» qosymshasy bóten JSN engizýden qorǵaý maqsatynda Egov júıesindegi azamattardyń mobıldi bazasymen sáıkestendirildi. Bul týraly Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Áset Turysov aıtyp berdi, dep habarlaıdy QazAqparat.

Vıtse-mınıstr «Ashyq» júıesiniń memleket menshigine ótkenin eske saldy.

«Júıeniń Ulttyq operator – «Ulttyq aqparattyq tehnologııalar» AQ qaraýyna berilgenin aıtqym keledi. Endi «UAT» AQ tehnıkalyq mamandary «Ashyq» júıesin tolyq ákimshilendirýmen aınalysady. Sonymen birge, mobıldi qosymsha únemi jańartylyp otyrady. 18 mamyrdan bastap Android-de «Ashyq» jańa nusqasy iske qosyldy, onda QR-kodty skanerlemeı-aq, óz mártebeńizdi teksere alasyz», - dedi Áset Turysov Ortalyq kommýnıkatsııalar qyzmetinde ótken baspasóz máslıhatynda.

Vıtse-mınıstr «Ashyq» qosymshasy azamattardyń mobıldi bazasymen biriktirilgenin atap ótti.

«Bóten JSN engizýdiń aldyn alý úshin «Ashyq» qosymshasy azamattardyń mobıldi bazasymen biriktirildi. Mobıldi baza Egov quramynda, sondyqtan basqa JSN engizilse, ol Egov derekterine sáıkes kelmeıdi. Turǵyndardan Egov mobile qosymshasyn júktep, osy qosymshamen sáıkestendirýdi suraımyn. Bul kóp ýaqytty qajet etpeıdi, osydan keıin siz mobıldi azamattar bazasyna kiresiz. Osylaısha, biz bóten JSN engizýdiń jolyn kesemiz», - dep túsindirdi Áset Turysov.

Vıtse-mınıstr 21 mamyrdaǵy jaǵdaı boıynsha paıdalanýshylar sany 1,6 mln adamǵa jetkenin atap ótti.